Mundu hobe bat irudikatu dute Ondarroako Arnasa jaian
Fibrosi kistikoa erdigunean jarri eta gaitza daukatenei eta haien familiei laguntzeko jaia egin da Ondarroan gaur [uztailak 16, zapatua] seigarrengoz. Goizean goizetik ibili da jendea Alamedan. Arnasa elkarteak eskerrak eman dizkie parte hartu eta lagundu duten guztiei.
Arnasa jaia, Ondarroan “Mundua zelakoa izatea nahiko zenuke?”. Galdera horri erantzuna eman diote gaur Ondarroan seigarrenez egin den Arnasa Elkartearen Jaian. Txikienek harrietan margoztu dituzte euren desioak: mundu polita irudikatu dute, ametsetakoa, lagunez inguratutakoa. Koloretsua eta alaia.
Kolorez eta irribarrez bete ditu baia ere orrialde zuriak Asisko Urmeneta ilustratzaile nafarrak. “Karrikaturak” egiten egon da goizean Alamedan, umez eta haien gurasoez inguratuta. Pozik jaso dute guztiek euren karikatura pertsonalizatua, eta batek baino gehiagok ingurukoei erakutsi nahi izan die, harro-harro. Haien aldamenean, aurpegiak margotzeko aukera ere eduki dute gaztetxoek.
11:25 aldera, Irrikitan kalejira egin dute Alamedatik Itsasaurrera. Porrotx, Tiritatxo eta Txirrimorraskiko kideekin, “Ametsen Zuhaitza” landatu dute. Han ere, mundu berri eta hobe baterako haziak erein dituzte, irudimena eta desioak aireratuz. Aurreskua dantzatu diote landatu duten zuhaitzari. Hazi berri bat, bizitza berri bat, beste modu batekoa, justuagoa, politagoa haziko da landatu duten hazitik. Jarraian, Artakaren eskutik, oihal ikuskizun zoragarria ikusi ahal izan da. Gorputzekin irudikatu dituzte oraingo honetan desiorik onenak. Eta Kukai Dantza&Brodas Brosen eskutik, Topa ikuskizuna egon da 13:30 aldera. Gizakiak harremantzeko duen premia azaleratu dute Alamedako agertokian.
Beroari aurre egiteko, Apar eta Bits festa, umeentzako jolasak eta ezustekoak egon dira arratsalde-iluntzean, Musika Plazan, eta gauean, Antuxuna eta Patx taldearen kontzertuagaz agurtuko dute hurrengo urtera arte elkartasun jaia.
Arnasa elkartea: “Behar ditugun gauzak hor daude beti. Gaixotasun kronikoak ez dauka etenik, beti dago hor”
Arnasako kideek eskerrak eman dizkiete beti alboan dituzten lagun, senide, boluntario eta parte hartzaileei. Eskerrak eman dizkiete Txirrimorraskiri, Bizipoza- ri eta Ondarroako Udalari: “Zuon laguntza barik ezingo genuke aurrera atera horrelako jai bat. Eskerrik asko”. Ondarroan jasotzen duten erantzuna ere azpimarratu dute: “Hiri handietan baino erantzun handiagoa jasotzen dugu hemen. Gaur ere, goizean goizetik hasi da jendea gerturatzen”.
Ikusgai, ikusteko. Bi urte oso txar pasa ditu Arnasa elkarteak. Ikusgaitasuna behar dute, jendeak ez badu ikusten, ez delako sentsibilizatzen, ez dakielako zeintzuk premia dituzten beste batzuek. “Behar ditugun gauzak, baina, hor daude beti. Gaixotasun kronikoak ez dauka etenik, beti dago hor”, adierazi idu Noemi Uribe Arnasa elkarteko kideak. “Gu ikusi egin behar gara, bestela gugaz erraz ahazten dira”.
Diru laguntzarik ia ez da egon pandemiak iraun duen tarte luze horretan, baina fibrosi kistikoa daukatenen premiek bere horretan jarraitu dute: “Ikerketak oso garrantzitsuak dira guretzat. Gaur egun, umeei jaiotzen direnean proba bat egiten diete, baina, hala eta guztiz ere, oraindik ez dago beharko luketeen tratamentu zehatzik, eta ikertu egin behar dira. Ikerketa baten azken fasera ailegatzea asko kostatzen da, hamar bat urte”, gogoratu du. Izan ere, fibrosi kistikoa daukatenentzat ezinbestekoak dira medikamentu berriak, ezinbestekoak kalitatezko bizitza bat eduki dezaten, ezinbestekoak biziraupena luzatzeko.
Fibrosi kistikoari gaixotasun ikusezina deitzen zaio, eta horrek arazoak sortzen ditu egunez egun: “Lehen begiradan ez da nabaritzen, baina gaitza daukatenek ezin dute jarraitu eguneroko erritmoa. Atseden gehiago behar dute, erritmo lasaiagoa. Nork bere medikazioa dauka, eta nork bere afekzioak dauzka. Gaixotasuna ez denez igartzen, beti joan behar zara txostenekin, erakusteko gaitza daukatela. Erraztasun gehiago beharko genituzke, laguntza, tratamenduak egiten dituztenerako…”. Horregatik, behar dutena lortu arte, ikusgaitasuna ematen jarraituko dute, mundu berri bat lortzeko pausoak ematen.
