Arbide Eskalada Taldearen rokodromoa martxan dago
Bazkidetza kanpaina martxan dago uztailaren 31ra arte, eta aurreratu dutenez, hitzaldiak, irteerak eta ikastaroak eskainiko dituzte.
Ondarroako Arbide Eskalada Taldeak rokodromo berriaren ateak zabaldu zituen ekainaren 27an. 2021eko apirilean hasi ziren auzolanean proiektuari ekiten, eta urte eta erdiz aritu dira lanean etengabe. Taldetik aipatu dutenez “prozesua gogorra izan da, baina merezi izan du“.
Hasiera batean gutxi batzuen ideia izan zen proiektua martxan jartzea proposatu, eta lortu ere egin dute. Proiektua aurkeztu eta bazkidetza kanpaina martxan jarri zuten, “hasieran bazkide egin zirenak itsuan etorri ziren, soilik paperean zegoen proiektu batean sinistu zuten, eta asko eskertzen diegu egindako esfortsua eta izandako konfiantza“. Horrela hasi zuten urte eta erdi iraun duten obra lanak: “Asko ikasi dugu denok bide luze honetan, hala nola erreminten erabilera, igeltserotza, iturgintza… barneratu ditugu”. Aitortu dutenez prozesua neketsua izan da, baina amaituta ikustean, “erabat asetu gaitu jendea bertan eskalatzen ikusteak”.
Rokodromoak gune ezberdinak ditu, hala nola bloke guneak, erresistentzia guneak, eta campus gunea. Gainera, hasi berrientzat eta haurrentzat egokitutako guneak ere badituzte, eta baita gimnasioa ere.
Jada lana eginda eta helburuak bete direla ikustean, egindako lanaren fruitua herritarrekin elkarbanatzeko unea heldu da: “Herriko jendeari proiektu honetan bazkide izateko aukera emateko bazkidetza kanpaina zabalik dugu, baina plazak mugatuak dira”. Orain arteko datuei erreparatuta, 25 familiarteko bazkide daude, eta 50 banakako bazkide. Kanpaina uztailaren 31ra arte zabalik egongo da, eta bi aukera eskaintzen dituzte; bazkide egitea edota erabiltzaile izatea.
Bazkideek rokodromoaren erabakietan parte hartzeko eskubidea izango dute, eta hala nola, erabileran ere abantaila gehiago. Bestalde, erabiltzaileek hileko kuota ordainduko dute eta rokodromoa erabiltzeko aukera izango dute askatasunez. Informazio gehiago nahi izanez gero elkartearekin harremanetan jartzeko gonbita egin dute, arbideskalada@gmail.com helbidearen bitartez.
Etorkizun oparoa
Proiektua hasi zenetik herrian interesa piztu dela sumatu dute elkarteko kideek, hala nola, jendea kirolera hurbiltzen ari dela. “Aurten, inoiz izan den ikasle kopuru handiena eduki dugu eskalada ikastaroetan. Lehenengo aldiz eskalatzen hasi den jendearen ilusioak bete egin gaitu, eta baita urteetan dabilen jendearen gorakadak ere”. Hori horrela izanda, urrira begira eskalda ikastaroak martxan jarriko dituzte, eta aurreikusi dutenez, ohi baino jende gehiagori klaseak emateko aukera zabalduko dute. Horrez gain, irteerak antolatuko dituzte, eta hitzaldiak ere eskainiko dira.
Taldeak eskerrak eman nahi izan dizkio proiektuan sinistu duen orori: “Eskertuta gaude esku bat bota duten danekin, bai eskulan bidez lagundu dutenekin, kamisetak erosiz edota antolatu ditugun ekimenetan parte hartuz eta interesa erakutsiz”. Hortaz, proiektua burututa, helburuak beteta eta ateak zabalik. Arbide Eskalada Taldea martxan da rokodromo berriagaz, eta herrian eskaladari indarra ematen jarraituko dute.
