Prest dago Berriatua Lagunkoia diagnostikoa
Hamar lagunek osatu dute diagnostikoa egiteko talde eragilea. Hala ere, inkesten bidez proiektua herrira zabaldu dute, edadetu gehiagori hitza emanez.
Berriatua Lagunkoia proiaktuko talde eragilearen bilera. Argazkia: Berriatuko Udala Berriatuak lehen urratsak eman ditu adinekoekin herri lagunkoia izateko. Udaleko ordezkari bi eta herriko zortzi jubilatuekin osatutako lantaldea lanean aritu da azken hilabeteetan, eta udalerriko egoera aztertuta Berriatua Lagunkoia proiektuko diagnostikoa osatu dute.
Proiektuaren helburu nagusia adinekoen bizi kalitatea hobetu eta herritarrak nagusitzen joan ahala ahalik eta herri lagunkoiena eta irisgarriena edukitzea da, eta zeregin horretan adinekoak eurak izan dira protagonistak. Jon Arriola Berriatuko alkateak azaldu duenez, hori da proiektuaren asmoa: “Udalak proiektua aurrera eramaten lagunduko ditu, baina edadetuak eurak izango dira ekimenaren sustatzaileak, eurek dakite‐eta non dauden premiak eta non eragin behar den”.
Hamar lagunek osatu dute diagnostikoa egiteko talde eragilea. Hala ere, inkesten bidez proiektua herrira zabaldu da, edadetu gehiagori hitza emanez. Inkesta etxez etxe igorri zen eta edadetuen elkartean edo udalean entregatu ahal izan zuten. Horrez gain, herriko merkatari, ostalari eta jendaurreko zerbitzuei inkesta bana igorri zaie establezimenduaren lagunkoitasun maila neurtzeko. Bestalde, eztabaida taldeak ere eratu dira, eta horien bidez ere jaso da edadetuen iritzia eta egoeraren berri. Guztira, 46 lagunek erantzun dute inkesta, eta talde fokaletan 11 lagunek parte hartu dute.
Ikuspegi globala. Diagnostikoa egiterako orduan aintzat hartu dituzten alderdiak ondorengoak izan dira: eraikinak eta aire zabaleko guneak, garraioa, etxebizitza, begirunea eta gizarteratzea, gizartean partehartzea, komunikazioa eta informazioa, herritarren parte hartzea eta enplegua eta gizarte zerbitzuak eta osasunekoak. Orokorrean, udalerriagaz gustura agertu dira herritarrak. Berriatua herri “oso atsegintzat” dute parte hartu duten gehienek, baina badaude zenbait kontu hobetzeko. Inkestatuen arabera, arazorik handiena herritik igarotzen den errepidean ibilgailuek daramaten abiadura eta segurtasun falta dira, eta talde fokaletan ere asko azpimarratu da herriaren erditik igarotzen den errepidearen inguruan dagoen kezka.
Berriatua Lagunkoia taldeko kideek irailean emango dituzte ezagutzera diagnostikoan jaso dituzten emaitza horiek guztiak aurkezpen zabal bat eginez. Hala ere, Berriatua Lagunkoia ez da diagnostiko honekin amaituko: proiektuak lau fase ditu, eta aurrerapausoak ematen joango dira, etengabeko hobekuntzan oinarrituta. Beraz, iraileko aurkezpenaren ondoren diagnostikoan oinarritutako ekintza plana egiten hasiko dira.
