Lekittarrak jaitsierako kanporaketak jokatu beharko ditu
Ondarroa beste urte batez ariko da Eusko Label ligan, orain Kontxako banderaren sailkapenean dute burua denek.
Asteburu erabakigarria zen Eusko Label ligan, sailkapeneko beheko postuetan batez ere. Zapatuan [abuztuak 27] etxean jokatzen zuen Aresek ia ezinezko zuen maila mantentzea eta jaitsierako kanporaketak lehiatu beharko zuen ontzia argitu behar zen. Bi ziren hautagai nagusiak, Santurtzi eta Lekittarra, lau puntuko abantaila zuen Soterak Isuntzarekiko.
Lehen txandan aritu ziren biak, Santurtzi bigarren kaletik eta Lekittarra laugarrenetik, beste behin Osertz Aldairenek ez zuten zortea alde izan kale zozketan. Ondarroa hirugarrenetik atera zen. Estropada hasi bezain laster atzean geratu zen Isuntza, bost segundora lehen ziabogan eta hamaikara bigarrenean. Hori gutxi ez, eta Santurtzi zioan lehen postuan. Atzetik, bigarren postuaren lehian, nor baino nor aritu zen Ondarroa Aresegaz, oso berdinduak joan ziren txanda osoan zehar, baina azkenenean etxeko traineruak aurrea hartu zion Antiguako Amari bi segundorengatik, 20.30.90. Lekittarra Soterarengandik urrun heldu zen 22 segundora, 20:47:08 haien denbora.
Areseko XV. Bandera Urdaibaik irabazi zuen 19.44.52ko denboragaz. Nagusitasunez gailendu ziren bermeotarrak, Hondarribia 8 segundora utziz, Orio 17 segundora eta Donostiarra 18ra. Ondarroa 10. izan zen, Lekittarra 11. azken postuko Zierbenaren aurretik.
Isuntzak Boiron domeka [abuztuak 28] goizean altxa zen lainoa bezain beltz zeukan kanporaketak ekiditzea. Miraria behar zuen bederatzi puntuko zuloari buelta emateko. Hainbestekoa zen lainoa Galiziako kostaldean, arduradunek estropada bertan behera uzteko zorian egon ziren. Lehenengo hasiera 45 minutu atzeratu zen eta zerua apur bat argitu zenean, epea amaiatu baino 10 minutu lehenago, hartu zuren aurrera egiteko erabakia.
Lekeitiarrek argi zuten txanda irabazi behar zutela, eta nahiz eta ondo ez hasi, atzetik aurrerako bidea egiteko gaitasuna erakutsi zuten, lehen ziabogan bost segundo galtzen zituzten Ondarroarekiko. Txanda oso berdindua izan zen lau ontzien artean, betiere Antiguako Amak lidergoan mantentzen bazen ere. Azken txanpan, berriz, Isuntza biziago helmugaratu zen Ondarroari eta Aresi aurrea hartuz: 20.06.22 Lekittarraren denbora, Ondarroa segundo batera eta Ares bi segundora. Lehen helburua beteta zuten, txanda irabaztea eta Santurtzi laugarren izatea.
Argazkia: Ondarroako Arraun Elkartea
Gainontzeko txandetako traineruek, aldiz, ez zioten Isuntzari askorik lagundu, denek hobetu zuten ezarritako marka. Beraz, matematikoki jaitsierako kanporaketak jokatu beharko ditu irailaren 17n Bermeon eta 18an Portugaleten. Beste alde batetik, Ondarroak amaitutzat eman zuen Eusko Label ligako bere jarduna, helburua beteta eta buru belarri jarri dira Kontxa prestatzen.
Isuntzako kideek denboraldi hasieran kanporaketa saihestea zuten helburu, baina ezin izan dute lortu: “Ondarroako banderatik aurrera puntu asko galdu ditugu, asko kirol errendimendutik kanpokoak izan dira kaleekin, txandekin eta denborekin zorte txarra izan dugu. Hala ere, ilusio handiagaz egingo diogu aurre kanporaketari, oso gogotsu gaude gure mailarik onena emateko prest. Lehenengo, berriz, begiz jota dute Kontxako bandera lekeitiarrek, bereziki garrantzitsua izan daitekeena: “Zortzi onenen artean sartzea ez da erreza izango, baina aukerak egon badaude eta gogotik borrokatuko dugu. Horrez gain, mentalki eta fisikoki etorriko litzaiguke sailkapena lortzea hiru aste falta direlako kanporaketarako eta sasoi onean heltzeko bikaina izango litzateke”.
Boiroko bandera Hondarribiak lortu zuen, aurreko eguneko Urdaibaik emandako erakustaldia berdinduz, eta bidez batez sailkapen nagusia Galiziara heldu bezala utziz. 19.20.72 izan zen Ama Guadalupekoaren denbora, Bou Bizkaia hamaika segundora heldu zen, Donostiarra 25era eta Orio 27ra.
