Arnasetik bideosormen lehiaketa martxan, gazteek hizkuntza ohituren inguruan gogoeta egiteko
Eusko Jaurlaritzak, Nafarroako Gobernuak eta UEMAk sustatutako ekimena da, eta udalerri euskaldunetako gazteen hizkuntza ohituren inguruan gogoeta piztu nahi du.
Arnasa gara ekimenak arnasguneak osatzen dituzten udalerri euskaldunetako gazteen hizkuntza ohituren inguruan gogoeta piztu nahi du, eta horretarako Arnasetik bideosormen lehiaketa antolatu dute, arnasguneetako 10 eta 16 urte bitarteko gazteek haien sormena erabiliz euskaragaz lotutako istorioak kontatzeko.
Lehiaketak hiru kategoria ditu: LH5 eta LH6. mailak, DBH 1. eta DBH2.maila eta DBH3. eta DBH4. mailak. Kategoria bakoitzean aurkeztu beharreko lanak ezberdinak izango dira, eta, azaldu dutenez, gazteek euren kabuz, lagunartean edo ikaskideekin batera landu ahal izango dituzte lanak.
LH 5. eta 6. mailako ikasleek LHtik DBHra berarekin dakartzan emozio, hizkuntza ohitura eta egoera berriak islatu behar izango dituzte haien sormen lanetan, formatu librean (marrazkia, bertsoa, poema, bideoa, abestia…). DBH 1. eta 2. mailako ikasleek, berriz, youtuber estiloan bideo-tutorial bat egin beharko dute, eta azkenik, DBH 3 eta 4. mailako ikasleek Hiru Damatxok ekoiztutako bideoan agertzen diren galderei erantzuten dion bideoa sortu beharko dute, elkarrizketa irudikatuko duen formatu batean. Julen Portilloren eta Hiru Damatxoren bideoak eta lehiaketaren oinarri guztiak Arnasa Gararen webgunean jarri dituzte ikusgai.
Sariak. Kategoria bakoitzak 500 euroko sari baliokide bat izango du, eta publikoaren saria ere banatuko da, guztira 2.000 euro banatuz.
