Anuska Tena: "Zein da dikea luzatzearen helburua? Hori da gure kezka"
Azken hilabeteetan Mutrikun zeresanak sortu dituzte hastear dauden portuko obra lanek. Ezjakintasunaren aurrean, Danborzaleak herri mugimendua sortu da.
- Nola sortu da Danborzaleak herri mugimendua?
Maiatzean jakin genuen Eusko Jaurlaritzaren 2004ko Plan Especial Puerto de Mutriku deituriko proiektua berrabiaratu behar zela, eta ekainean biltzen hasi ginen. Sentsibilitate ezberdinetako jendea bildu gara, ez gara alderdi politiko baten parte. Udalari eta Eusko Jaurlaritzari informazio eskatu eta hori herritarrei partekatzeko. Bestalde, proiektua nolabait gelditzeko. Maiatzean izan genuen obraren lizitazioaren berri eta ekaina aldera hasi ginen batzen.
- Zertan datza 2004ko proiektuak?
Euskal Herri mailan erreferente bilakatuko zen arrantza portu bat sortzea zen helburu nagusia, eta horrela saldu zen. Arrantzaren etorkizuna kolokan zegoen jada garai hartan, 165 lanpostu sortuko zituela baieztatu zuten, eta bakar bat sortu da. Proiektua hasi zen, baina dirua bukatu zela argudiatuz, bukatu gabe geratu zen proiektua, gaur arte.
- Orain, nola berrabiarazi nahi da proiektua?
Eusko Jaurlaritzak dikea 100 metro inguru luzatzea ekarriko duen obra jada lizitatu du, Mutrikuko Udalari eta herriari kontsultatu gabe. 15 urte geldik egon ondoren, bapatean etorri da albistea.
- Dikearen luzatzea da, oraingoz, onartuta dagoena.
Oraingoz lizitatu dena hori da. Baina 2004ko Plan Berezia delakoa, osotasunean sinatu zen eta hori indarrean dago. Sinatu zen proiektuaren baitan dikearen luzatzea urrats bat da soilik, geroago beste batzuk etortzeko arriskua dago. Eta orain abiatuko den horren aurrean, gure galdera da, zertarako? Duela ia hogei urte egindako proiektua bapatean berrabiarazteak, zein helburu du? Zein da dikea luzatzearen helburua? Dimentsio horietako proiektuak helburu batekin egiten dira. Hori da gure kezka.
- Zer proposatzen duzue?
Aurreikusi zer ekarriko lukeen dikearen luzatzeak, eta horren aurrean herriaren esku ustea erabakia, eta horren araberako planteamendu bat egitea. Obra lanak hasi baino lehenago herri galdeketa bat deitzea da xedea, mutrikuarrok erabaki dezagun zein Mutriku nahi dugun.
- Lanak hasi baino lehenago.
Hori da, behin lanak burutu ondoren, Eusko Jaurlaritzak kudeatuko du gunea, eta Jaurlaritzaren itsas pribatizazioaren kudeaketaren baitan egongo da. Portuaren erabilera ez da herritarren esku geratuko. Horregatik, orain da hausnartzeko unea, galderak egin eta erantzunak bilatzekoa. Herritar askok denbora behar izan dute, edo beharko dute, egungo egoeraren inguruan hausnartu eta aurrerapauso bat emateko, egungo eta ondorengo Mutriku eta mutrikuarron beharrak zeintzuk diren defendatzeko alegia. Herrian gai honek zauri asko zabaldu ditu eta horretaz jabetzen gara. Baina egoera aldatu egin da, hortaz, mahai gainean jarri beharreko gai bat da.
- Zein da emango duzuen hurrengo pausoa?
Herri galdeketa bat abiatzeko, sinadurak bildu behar dira. Hori dela eta, jendea sinatzera animatu nahi dugu. Jende bat ados egongo da proiektuarekin eta beste batzuk ez, baina bentzat, entzun dezagun zer nahi duen herriak. Sinadura bilketa abian dugu, danborzaleak@gmail.com helbidearen bitartez, eta baita mahai fisikoen bidez. Hurrengoa, irailaren 8an izango da bertso saioaren aurretik eta irailaren 10ean goizean Beheko plazan, eta arratsaldean, Samikollan. Hala ere, sinatzeko konpromisoa hartu gabe informazioa nahi duen oro ere hurbiltzera gonbidatzen dugu, eskura dugun guztia eskainiko diogu.
