Goixerri eta Aratz, Jai Alai World Super Court Txapelketako irabazle
Mutrikuko Danok Bat elkarteko bikoteak, Markina-Xemeingo Iñaki eta Julenen aurka lehiatu du txapelketako final handia.
Magic City Miamiko (Estatu Batuak) pilotalekuan lehiatu da World Super Court bikoteen arteko txapelketa esanguratsua. Magic Jai Alai eta Nazioarteko Euskal Pilota Federazioak elkarlanean antolatutako txapelketak Frantziako, Mexikoko, Filipinetako, eta Estatu Batuetako bikote onenak batu ditu. Lehia horretan aritu dira, hain zuzen ere, Mutrikuko Danok Bat elkarteko Goixerri eta Aratz, eta Markina-Xemeingo Julen eta Iñaki, anaiek osatutako bikoteak.
Mundu mailako lehiaketa. Finalera eskualdeko bikote biak sailkatu ziren, eta elkarren arteko lehia estuaren ostean, hirugarren setean Mutrikuko bikotea nagusitu zen, txapelketako irabazle izanik. “Munduko bikote onenek eskainitako ikuskizunaz gozatzeko aukera izan dugu. Zorionak eman nahi dizkiet finalerdietara heldu diren bi bikoteei, eta bereziki Goixerri eta Aratzi, azken seten egindako markagailu iraulketa ikusgarriarengatik” adierazi du Scott Savin Magic City Jai Alaiko koordinatzaileak.
