Mutrikuko Herri Krosa eta Kros txikia, lehiatzeko prest
Lasterketa zapatuan [urriak 29] izango da. Proban parte hartu nahi dutenek Herrikrosaren web atarian eman dezakete izena aurretiaz.
Zapatuan 11:45etan irtengo dira Mutrikuko XIX.Herri Kroseko parte hartzaileak Goiko Plazatik, eta Debarainoko ibilbidea egin beharko dute, joan-etorria eginez; korrikalariek 10 kilometroko ibilbidea osatu beharko dute.
Mutrikuko Talaixa Triatloi Klubak eta Mutrikuko Udalak elkarlanean antolatzen duten kirol proban gaur gaurkoz 54 korrikalarik izena eman dute. Hala ere, parte hartu nahi dutenek Herrikrosaren web atarian eman dezakete izena aurretiaz, eta zapatuan bertan ere izena emateko aukera edukiko dute Goiko Plazan ipiniko duten mahaian.
Kros txikia. 12-16 urte bitartekoentzako 4 kilometroko proba egongo da. 11:45ean irtengo dira, hain zuzen ere, proba nagusikoei irteera eman ostean. Izena ematea dohain izango da, baina kamiseta eskuratu nahi dutenek 5 euro ordaindu beharko dute.
Lehen hezkuntzakoak. Lehen Hezkuntzako umeentzako probak ere egongo dira zapatu goizean Mutrikun: LH 3. eta 6. mailakoentzat. 1.200 metroko lasterketa egin beharko dute, eta 11:00etan hasiko dute proba.
