Mutrikuko Udalak 'Linea Verde' aplikazioa abian jarri du
Bide publikoko gorabeherak konpondu, udalarekin komunikazioa hobetu eta Mutriku hobetzeko asmoz jarri dute abian. Erabilerari buruzko informazio puntuak ezarriko dituzte.
Iturria: Mutrikuko Udala Mutrikuko Udalak Linea Verde mugikorrerako aplikazioa martxan jarri du, helburua Udalaren eta herritarren arteko komunikazioa hobetzea izango da, hala nola, bide publikoko arazoak jakinarazteko bide eraginkor bilakatuz.”Mutrikuko Udalak askotan ez ditu ezagutzen mutrikuarren etxe inguruetan edo herri osoan zehar dauden konpondu beharreko gauza guztiak eta denboran konpondu gabe egoten dira”.
Aplikazioak mota askotako gertakarien berri emateko aukera ematen du: espaloi eta galtzaden egoera txarra, estolderiekin zerikusia duten arazoak, kanpo argiteriaren akatsak, zaborren pilaketak, hiri tresnen egoera txarra, lorezaintza beharra, seinale eta semaforoen egoera txarra, intsektu eta karraskari izurriak, garbiketa beharra, igogailuetan arazoak, altzari eta tresna bilketak, ibilgailuen-erretira, trafikoa eta mugikortasunarekin arazoak, eta beste zenbait gai.
Zerbitzu berria erabili ahal izateko, beharrezkoa izango da Linea Verde aplikazioa deskargatzea; eskuragarri dago Google Play edo App Storean. Aipatutako gertaeren berri emateaz gain, erabiltzaileak ingurumenari buruzko edozein kontsulta ere egiteko aukera izango du, eta gehienez ere, 24 orduko epean gaian aditu den talde baten erantzuna jasoko du, erabat doan.
Mutrikuko Udalak Linea Verde aplikazioa erabiltzera animatu ditu herritarrak, baina zenbait herritarrek teknologia berriekin erraztasunik ez dutela jakitun izanik, informazio puntua ezarriko du, herritarrei laguntza eskaintzeko; azaroaren 29an [martitzena] 11:00etatik 13:00etara eta 17:30etatik 19:30etara Txurruka Plazan. Aplikazioa deskargatzen, instalatzen eta honen erabilera azaltzen arituko dira Udaleko arduradunak.
Pazientzia. Udalak lehenengo egunetan pazientzia izateko eskatu du: “Aplikazioak barne antolaketan aldaketa handia ekarri duenez ohitzeko denbora beharko dugu”. Aplikazioa mutrikuar guztien eskutan jarritakoan, intzidentzia kopuru handia jasoko dutela aurreikusten dute, berritasunak bultzatuta.
