Esperientzia turistiko gastronomikoak sortzeko ekimena abiatuko dute Lea-Artibain
Bizkaiko Foru Aldundiak Bilbao Ostalaritzako Goi Eskolarekin elkarlanean abiatuko du ekimena.
Bizkaiko Foru Aldundiak kalitatezko esperientzia turistiko gastronomikoak sortzea eta hobetzea helburu duen ekimena garatuko du Bizkaiko eskualdeetan kasuan kasuko zonalde horietako tokiko produktuari lotuta, eta programari hasiera emateko Lea Artibai eskualdea hautatu du, eskualde pilotu gisa.
Aldundiak 113.798 euro jarriko ditu ekimena garatzeko, hain zuzen ere, Bilbao Ostalaritzako Goi Eskolarekin antolatuko du: “Erakunde honek prestakuntza eta aholkularitza eman diezaien eskualdeetako sukaldaritzako profesionalei gastronomiarekin lotutako eta lurraldeko eskualde guztietako tokiko produktuari eta nortasunari uztartutako turismo esperientziak sortzeko eta hobetzeko”.
Proiektuak turismo estrategia bultzatzeko “palanka gisa” balio nahi duela adierazi dute, zehazki, produktu turistikoak sendotzeko eta garatzeko: “Gastronomiaren eta nortasunaren inguruan, enpresa-lehiakortasuna babesteko, turismo-ekosistema arduratsua garatzeko eta talentua indartzeko, sektoreko profesionalen gaitasunak sendotuz”.
Parte hartu. Ekimenean parte hartu nahi duten establezimenduak aztertuko dira, eta bost establezimendu aukeratuko dituzte. Prestakuntza-programa orokorra diseinatuko da, aurrez aurrekoa eta online. Besteak beste, elikagaien manipulazioa, alergenoak, jatetxeen eta ostalaritzaren arloan indarrean dauden araudiak eta kostuen kudeaketa bezalako gaiak jorratuko dira.
Ondoren, lokal bakoitzaren neurrira egindako proiektuak gauzatuko dira, “tokiko produktuan oinarritutako kalitatezko esperientzia gastronomiko paregabeak sortzeko eta lokal horiek ekoizpen eta kontsumo jasangarriarekin lerrokatzeko”. Sukaldea, aretoa, kudeaketa, elikagaien higienea, digitalizazioa eta iraunkortasuna jorratuko dira.
Profesionalek prestakuntza jaso ondoren proposamen gastronomiko propioak diseinatuko dituzte: ” Xedea da proposamen horien bidez kalitatezko esperientziak eskaintzea, bakarrak eta bereiziak, tokiko produktu eta ekoizleekin lerrokatuta egongo direnak”. Ondoren establezimenduen jardueraren eta esperientzia gastronomikoen garapenaren jarraipena egingo da, emaitza baloratzeko, eta lokal horietako bakoitzaren memoria exekutiboa jasoko duen txostena egingo da.
