Goi mailako bertsolariak elkartuko dira Markina-Xemeingo Kontzezio Eguneko jaialdian
Amaiur kultur elkarteak sarrerak salgai jarri ditu 10 eurotan Ateun harategian eta Tate gozotegian.
Ohiturari eutsiz, Kontzezio Egunak bertso jaialdi handia ekarriko du Markina-Xemeingo Uni frontoira, abenduaren 8an. Bertsozaleentzat hitzordu berezia bihurtu den jaialdian, ohi modura, goi mailako sei bertsolari ariko dira kantuan. Hiru emakume eta hiru gizon elkartu ditu aurten jaialdia antolatzen duen Amaiur Kultur Elkarteak. Gai jartzaile lanetan ariko da Amaia Agirre. Uni pilotalekuko oholtzara aterako dira aurten: Maialen Lujanbio, Nerea Ibarzabal, Alaia Martin, Sustrai Colina, Aitor Mendiuze eta Aitor Sarriegi.
17:30ean hasiko da saioa, eta sarrerak aldez aurretik erosi ahalko dituzte 10 eurotan, beste urte batzuetako ohiko tokietan, Markina-Xemeingo Ateun harategian eta Tate gozotegian. Antolatzaileek jakinarazi dute, berogailuak jarriko dituztela hotzari aurre egin ahal izateko.
Finaleko ataria. Markina-Xemeinen elkartu daitezke Bertsolari Txapelketa Nagusiko zortzi finalistetako bost. Maialen Lujanbio 2017ko txapelduna ziurtatuta dauka tokia abenduaren 18an Iruñeako Nafarroa Arenan. Alaia Martin eta Sustrai Colina, lehen eta bigarren postuan daude hurrenez hurren sailkapen orokorrean. Ibarzabal markina-xemeindarra laugarren dago. Aitor Mendiluzek zapatuan [abenduak 3] Bilboko Bizkaia frontoian eskuratu dezake finalerako txartela, Durangoko Landako Gunean irabazi ostean aukera asko ditu.
