Nerea Ibarzabal markina-xemeindarrak finalerako txartela eskura dauka Baionako saioa irabazita
Zapatuan [azaroak 26] 671,5 puntu lortu zituen Sustrai Colinak baino 3,5 puntu gehiago.
Argazkia: Bertsozale Elkartea. Nerea Ibarzabalek eta Sustrai Colinak Bertsolari txapelketa Nagusiko elkarren aurkako bigarren lehia zuzena izan zuten. Irunen Colinak hartu zion aurrea sailkapenean Ibarzabalari, baina zapatuan [azaroak 26] markina-xemeindarrak lortu zuen garaipena. Biak ala biak eskuan dute abenduaren 18an Iruñeako Nafarroa Arenan kantuan aritzea.
Azkenaurreko finalaurrekoak 2.000 pertsona baino gehiago elkartu zituen Baionan (Iparraldea). Bertsolariek ez zuten hutsik egin eta ikuskizuna aparta eman zuten, denetan onena Nerea Ibarzabal izan zen. Markina-xemeindarrak 671,5 puntu lortu zituen Sustrai Colinak baino 3,5 gehiago bakarrik. Hirugarren izan zen Beñat Gaztelumendi 656,5 puntugaz, ostean Julio Soto 643,5 puntugaz eta Unai Agirre 639,5 puntugaz, Eñaut Martikorena izan zen azken sailkatua 584 puntugaz.
Ibarzabalek saio hasiera bikaina izan zuen hamarreko txikian eta zortziko handian zein txikian nagusitu zen. Hasierako agurretik bertsozaleak erakarri zituen eta maila oso erregularra erakutsi zuen saio osoan zehar. Ganbarako lanagaz saioa borobildu zuen. Amaierako agurra gainera “Ondarrutarrak haiek mutilak” doinuan abestu zuen.
Bertsolari markina-xemeindarra zapatuan [abenduak 3] Bilboko Bizkaia frontoian jokatuko den azken finalaurrekoaren zain geratzen da. Hori bai, ondo bideratuta du zazpi bertsolari onenen artean sartzea, eta Maialen Lujanbio txapeldunagaz finalean kantatzea. Ibarzabal laugarren postuan dago kokatuta sailkapen orokorrean 1.344,5 puntugaz. Bilbon Aitor Mendiluze, Amets Arzallus, Joanes Illarregi, Jone Uria, Maddalen Arzallus eta Saioa Alkaiza ariko dira kantuan.
