Berriatuan jokatuko da 4. urtez jarraian zesta-puntako banakako txapelketa
Barikuan [abenduak 2] eta zapatuan [abenduak 3] Mendibarren frontoian emango zaio hasiera final hamaseirenetako neurketekin.
Berriatuko Udalak, herriko zesta eskolak, Jai Alive-Gernika Jai Alai enpresak eta Munduko Pilota Batzarrak antolatuko dute 2022ko zesta-punta banakako txapelketa. Berriatuko Mendibarren frontoiak hartuko ditu laugarren urtez jarraian Jai Alai World Tourreko puntistarik onenak. Herriko eragileek hiru urterako akordioa sinatu zuten 2021ean. “Jai Alai World Tour 2022 urte arrakastatsu honi bukaera emango dion txapelketa izango da banakakoa”, esan dute antolatzaileek.
Denborarik galdu barik, barikuan [abenduak 3] hasiko da txapelketa, final-hamaseirenekin. Lehen partidan Jon Bullet Zabala markina-xemeindarrak eta Julen Del Rio atzelariek neurtuko dituzte indarrak, eta bigarrenean, Gonzalo eta Alex ariko dira. Zapatuan [abenduak 4] Unax eta Gorka ariko dira lehendabizi, eta Johan eta Cosme ondoren. Jaialdi denak 21:00etan hasiko dira Mendibarren pilotalekuan.
Astero txapelketako kanporaketa bat jokatuko da. Datorren asteburuan, esate baterako, bariku eta zapatuko partidetako irabazleak ariko dira nor baino nor gehiago. Abenduaren 16an eta 17an hasiko dute txapelketa izar nagusiek, abenduaren 13an argitu dute antolatzaileek aurkezpenean nortzuk izango diren. Final handia abenduaren 30ean jokatuko da.
Aritz Erkiaga ispastertarra da azken txapelduna, eta urte osoan zehar bikoteka lortutako garaipen guztiengatik txapela janzteko hautagai nagusietako bat izan daiteke. 2020an Jokin Arbe markina-xemeindarrak irabazi zuen, eta 2019an, Berriatuan jokatu zen lehen txapelketan, Imanol Lopez nagusitu zen. Hori bai, inork ez ditu berdintzen Iñaki Osa Goikoetxeak dituen banakako hamabi txapelak.
