Gabonetako argien piztuera egingo dute Markina-Xemeinen
Udalak eta Hemen Be Bai merkatari elkarteak gabonetako argien piztuera egingo dute bihar [abenduak 1] 20:15ean.
Markina-Xemeingo Udalak eta Hemen Be Bai merkatari elkarteak gabonetako argien piztuera egingo dute bihar [abenduak 1]. 20:15ean jarri dute hitzordua udaletxe aurrean. Udal ordezkariek jakinarazi dutenez, egunero 23:00etan itzaliko dituztela gabon argiak. Bakarrik jaiegunetan izango dute ordutegi berezia.
Hemen Be Bai merkatari elkarteak gabonetako kanpaina martxan dauka, eta argien piztuera ekintza nagusietako bat zalantzarik gabe. «Azken urteetan merkatari elkartea osatzen dugun dendariontzat jaialdi moduko bat da», esan dute. Hemen Be Bairentzat kanta osatu zuen Irai taldeak zuzeneko emankizuna eskainiko du, merkatari elkartearen beste ekintza batzuetan egin bezala.
Horrez gain, tonbolako sariak banatuko dituzte, eta jan-edana egongo da. Deskontuak eta produktuak daude aukeran, guztira ia 100 sari banatuko dituzte. Lehendabizikoak saltoki bakarrean trukatu beharko dira abenduaren 15a baino arinago, eta bigarrena, bihar [abenduak 1] emango dituzte produktuak irabazleei. «Lehen aldia da horrelako formatua egiten duguna, eta markina-xemeindarren harrera oso ona izan da, ohiko beherapenez gain, bestelako produktuak eskaini nahi genituen».
Hurrengoa. Hemen Be Bai merkatari elkarteak gabonetako zozketa jarriko du martxan. Sari handiak banatuko dituzte: 500 euroko, 250 euroko, 150 euroko eta 100 euroko erosketa txeke bana. Txekeak 2023ko urtarrilaren 9tik 15era gastatu beharko dira elkarteko dendetan.
Zenbaki sarituak abenduaren 31an 15:00etan aterako dituzte. Zenbaki saridun hauek sare sozialetan eta elkartekideen dendetan egongo dira erakusgai urtarrilaren 5era arte. Egun horretan 19:30ean, irabazleak eta ordezkoak Babbel tabernara hurbilduko beharko dira bertso poteoa hasi baino lehen sariak jasotzeko. Jakinarazi dute agertzen ez direnak sari barik geratuko direla.
