Markina-Xemeingo Ernaik euskararen inguruko lanketa osatu du
Bideo baten bidez herriko eragile desberdinak elkarrizketatu dituzte haien iritziak eta hausnarketak jasotzeko.
Argazkia: Markina-Xemeingo Ernai Markina-Xemeingo Ernaik lanketa desberdinak egin ditu ikasturte honetan eta Euskaraldia eta Euskararen Nazioarteko Eguna baliatuz, herriko euskararen inguruko ikerketa osatu du. “Beti esan digute Markina-Xemein eta Lea-Artibai euskararen arnasgunea dela, baina igarri dugu erabilera asko jaitsi dela azken urteetan”, nabaritu dute gazteek.
Herritarrak kontzientziatzeko kanpaina egin dute azken batean: «Herritarrak, eta gazteak batez ere, kontziente eta jakitun izan behar dira zein den gure arduraz euskarari dagokionez. Herria euskararen arnasgunea zein puntutaraino den aztertu behar dugu eta etorkizunera begira gure eginbeharrak zehaztu».
Hasteko, moskeo kanpaina bat abiatu zuten herriko hainbat tokitan kartelak jarri zituzten euskararen inguruko hainbat datu zabaltzeko asmoz. Ondoren, bideo bat grabatu zuten. Bertan herriko hainbat eragilek, adin eta genero desberdinekoak, euskararen inguruko hainbat galdera erantzuten dituzte, eta oro har, hizkuntzarekiko hausnarketak plazaratzen dituzte.
Belaunaldi berrietan jarri dituzte erdigunean, ikus-entzunezkoak kontsumitzeko moduan batez ere. “Erabilera jaitsi da bai, baina kezkatzen gaituena euskararen kalitatea da, hori da eragileek igarri eta azpimarratu dutena. Mundu globalizatu honetan sare sozialek informazio iturri moduan hartu duten garrantzia ikusita, jasotzen dugun informazio kopuru handia gaztelerazkoa da. Berdina gertatzen da ikus-entzunezkoetan. Gero, eragin zuzen horregatik gazteak inkontzienteki gaztelera pasatzen dira”.
Azkenik, azken egunetan mural bat marraztu dute “euskeriek eitxen gaitsu aske” mezuagaz: “Euskara delako amesten dugun Euskal Herri askera bidean beharrezko giltza. Euskarak egiten gaitu aske. Zaindu eta erabili daigun gure hizkuntza. Oin eta hemen, eginzu euskaraz Markina-Xemeinen!”.
