'Hil Arte Bizi' egitasmoa errepikatuko dute Lekeition
Edukien aurkezpen hitzaldia otsailaren 15ean izango da kultur etxeko Azkue aretoan.
Aurreko aldian, 2022ko urte amaieran, izandako arrakastaren ondoren, berriro ere ‘Hil Arte Bizi’ egitasmoaren tailer berriak eskainiko ditu Lekeitioko Udalak. Jakinarazi dutenez, asko izan ziren aurrekoan parte hartzeko aukerarik gabe geratu zirenak, ondorioz errepikatu egin nahi izan dute. “Helburua da heriotzaren aurrean herritarrek dituzten eskubideak azaldu eta erabakiak hartzen laguntzea”, azaldu dute.
Nere Erkiaga egitasmoaren bideratzaileak aurkezpen hitzaldia eskainiko du otsailaren 15ean 18:00etan, kultur etxeko Azkue aretoan. “Helburua herritarrak heriotzaren aurrean ahalduntzea. Heriotzaren inguruan ditugun eskubideak eta erabakiak argitzeko tailerrak dira. Elkarrekin heriotzari diogun beldurra zeharkatuko dugu”, zehaztu du. Zortzi tailer emango ditu Erkiagak, martxoaren 1etik maiatzaren 10era bitartean. Bakoitza bi ordu eta erdikoak izango dira kultur etxeko Txitxintokian izango dira. Bideratzaileak argitu du egitasmoa ez dela doluan daudenentzat egokia.
Interesa dutenek eranskina bete behar dute eta 48 euroko ordainketa osatu. Udaletik azaldu dute, hilean zortzi saioko ekintza bategatik beste zerbitzu batzuetan, Kiroldegian adibidez, kobratzen duen kopuruan oinarrituta ezarri dutela prezioa. Eranskina eta agiria udaletxeko harreran eman daiteke, edo bestela udala@lekeitio.eus posta elektronikora bidali. Otsailaren 15etik 27ra eman daiteke izena.
Tailerra aurrera eramateko gutxieneko pertsona kopurua bost pertsonakoa da, eta gehienezkoa hamabi. Kopuru hori gainditzekotan, lehentasuna izango dute Lekeition erroldatutakoek, eta izena emateko ordena izango da onarpenerako irizpidea. Hizkuntzari dagokione, euskarazkoa izango da. Baina esan dute parte hartzaile bakoitzak emozioak adierazteko errazen duen hizkuntza erabili ahal izango duela.
