Iratxe Lasa Arana da Markina-Xemeingo EH Bilduren alkategaia
Lasak Markina-Xemeingo EH Bilduren indarra nabarmendu nahi izan du, “biderik malkartsuena ere” gainditzeko gai dela esanez.
Argazkia: Markina-Xemeingo EH Bildu. Iratxe Lasa Arana da Markina-Xemeingo EH Bilduren alkategaia maiatzaren 28ko udal hauteskundeetan. Lasa duela 20 urte heldu zen Markina-Xemeinera eta herriak “erabat maitemindu” zuela dio.
Lasa Markina-Xemeingo EH Bilduko lehenengo emakume alkategaia da. Erronka berriaren inguruan aurkako sentimenduak ditu: “Ilusioa bai, eta baita ilusioa beste beldur ere, baina aurre egingo diogu”.
Taldearen indarra nabarmendu nahi izan du, “biderik malkartsuena ere” gainditzeko gai dela esanez; “errez” gainera, eta horrek “ziurtasuna” ematen diola dio. Era berean, lan taldearen esperientzia, ilusioa, gogoak edota gosea aipatu ditu. Taldea ez du bakarrik zinegotzietara mugatzen, “denok osatzen dugu EH Bildu eta denon artean hartuko ditugu erabakiak, lana ezinbestekoa delako. Lan taldearen balioa azpimarratu nahiko nuke, hautagaitzari benetako balioa ematen dio taldeak eta”. Argi du Markina-Xemeingo Udalean egin nahi dituen aldaketak: “Udala eta udal kudeaketa demokratikoagoa egin nahi dugu, baita euskaldunagoa eta feministagoa ere”.
Lasari buruz. Hizkuntzetan aditua da Lasa (Euskal Filologia eta Lengua eta Literatura espainolean graduatua). Baita hizkuntza normalkuntzan unibertsitate aditua ere. Horrez gain, hizkuntza zuzentzailea, hizkuntzalaritza eta literatura gaietan ikerlaria ere bada, eta Euskaltzaindiaren aholkularia toponimia gaietan. Gaur egun, Markina BHI institutuko irakaslea da. Horrez gain, udaleko jarduna ondo ezagutzen du. Markina-Xemeingo Udalean 10 urtez euskara normalkuntza teknikari aritu zen, EH Bildu aginduan zegoela zinegotzi izan zen beste lau urtez.
