200 igerilari batu ditu Ondarru Sariak
Bizkaiko Txapelketan emaitza nabarmenak lortu zituzten Ondarroa Igeri Taldeko igerilariek.
Ondarroa Igeri Taldeak antolatuta, zapatuan [otsailak 11] XXXI. Ondarru Saria lehiatu zuten Zaldupe udal kiroldegiko igerilekuan. Igerilari federatu eta eskolarren artean ia 200 igerilari batu zituen probak, zehazki, sei taldetakoak; Igorre Igeriketa Taldea, Bermeoko Kikunbera, Zallako Zurkide, Markina-Xemeingo Atxondo, Amorebieta-Etxanoko Igeriketa Taldea eta Ondarroa Igeri Taldea. “Bizkaiko marketan ez gara ibili baina sentsazio onak izan ditugu”, adierazi du Ioar Urkiri Ondarroako entrenatzaileak.
Antolatzaileek probari buruzko balorazio oso positiboa egin dute. “Oso pozik gaude izandako erantzunagaz, igerilekuaren instalazioak nolakoak diren kontuan izanda jende asko biltzea lortu genuen”. Gainera, aurten berrikuntza aipagarri bat egon da, online ikusteko aukera eskaini dute YouTubeko kanalaren bitartez: “Ez dago lekurik ikusleentzako, eta aurten lehenengoz, online eskaini ahal izan dugu proba ikusteko aukera. Igerilari asko ziren, eta gurasoak ezin izan zuten etorri ikustera, ez baitugu lekurik jendea sartzeko. Horrela probak ikusi ahal izan dituzte”.
Bi txandatan banatu zituzten probak eta sari banaketak: “Lehenengo federatuek egin zituzten probak, eta bukatuaz batera sari banaketa egin zen igerilekuan bertan. Ondoren, eskolarrak etorri ziren”. Neska zein mutil batera burutu zituzten probak eta hortaz, sailkapenak ere ez ziren bitan banatu, sailkapen bakarra egon zen. “Normalean sexuaren eta adinaren arabera banatzen dituzte probetan, baina pasaden urtetik aurrera guztiek batera lehiatzen dute sarietan. Hortaz, orain entrenatzen duten bezala lehiatzen dute, guztiak batera”.
Ondoren, ohi modura, igeri eskolako gazteenek erakustaldia egin zuten, euren aurrerapenak erakustek0, 30 igerilari inguru bildu ziren.
Bizkaiko txapelketa. Pasaden asteburuan burutu zen gazteen Bizkaiko Txapelketa Barakaldon, eta aurreko txapelketetan lortutako denborei esker Ondarroa Igeri Taldeko bederatzi igerilarik lehiatu zuten; bederatzi dominagaz bueltatu ziren Ondarroara, zehazki, urrezko bost domina eta zilarrezko lau dominagaz. “Emaitza ikusgarriak lortu dituzte, nahiz eta guztiak ez diren podiumera igo, parte hartu duten igerilari guztiek hobetu dituzte marka pertsonalak” zehaztu du Ioar Urkiri Ondarroa Igeri Taldeko entrenatzaileak.
