Danon Artean Errugbi Taldeak hitzordua du zapatuan
Domekan eskola kiroleko topaketak 120 ume batuko ditu Mutrikun.
Danon Artean Errugbi Taldeak Iruña Rugby Club taldearen aurkako partida lehiatuko du zapatuan [martxoak 4], 12:00etan, Mutrikuko San Miguel zelaian. Euskal Ligako 18 urte azpiko kategoriako B taldeko partidua izango da.
Eskola kirola. Errugbi eskolak topaketak egiten ditu hilabetero Gipuzkoako zelai ezberdinetan, eta hain zuzen ere, martxoko topaketa domekan [martxoak 5], 10:30ean izango da, Mutrikun. 120 neska mutil bilduko ditu topaketak; La Única, Bera Bera, Eibar/Mutriku eta Ordizia taldeak izango dira topaketan parte hartuko dutenak.
10 eta 12 urte azpikoen arteko lagunarteko partidak jokatuko dituzte, zehazki, zazpi minutuko bi partida aurkari bakoitzarekin. “Ondoren hirugarren denbora eskainiko du guztientzat Mutriku Rugby taldeak, eta egun aproposa izango da herriko eta inguruetako neska mutilak errugbia ezagutzeko” adierazi dute Mutrikuko taldeko ordezkariek.
