Gizonezkoen elite mailako Euskal Herriko Txapelketa, abian
Txapelketako lehen jardunaldiak A eta B multzoetako bikoteak elkartu ditu. Puntukako sailkapenak zabalik utzi du txapelketan aurrera egiteko aukera, eta gaur-gaurkoz oraindik ez dago hautagai argirik.
Argazkia: Danok Bat. Abian da jadanik gizonezkoen elite mailako lehen Euskadiko Txapelketa, Mutrikuko Miruaitz pilotalekuan. Txapelketa horretako garaileek profesionalekin jokatzeko aukera edukiko dute. Lehendabiziko jardunaldian, barikuan, A taldeko eta B taldeko zesta-puntistek jokatu zuten. Garaipenaren lehian aritzeaz gain, ahalik eta tanto gehien egiteko eta gutxien jasotzeko saiakera egin zuten denek ala denek, average horrek zeresan handia baitu: puntuak banatzen dituzte horren arabera.
Lehen partiduak Basterra eta Atain Alberdi eta Mandiolaren kontra elkartu zituen. 30-25 nagusitu ziren lehenengoak, eta 60 puntu jaso; bigarrenek, hogei tantotik gora egin ondoren, 40 jaso zituzten. Alberdi eta Mandiola nagusi agertu ziren partiduaren lehen erdian; apurka-apurka, Basterra eta Atain jokoan hobeto igartzen hasi ziren, eta azkenean markagailua iraultzea lortu zuten.
Bigarren norgehiagokak Urko Lekerikabeaskoa eta Ion Ibarluzea (aditu askoren ustez, hautagai den bikotea) Urreisti eta Mancisidor mutrikuarren aurka aritu ziren. Bigarrenek, etxean jokaturik, hobeto ezagutzen zuten Miruaitzeko kantxa, eta abantaila hori baliatu zuten, 30-17 nagusitzeko. Irabazleek 80 puntu jaso zituzten, eta galtzaileek, berriz, 20 puntu.
Argazkia: Danok Bat.
B taldeko jokalariei dagokienez, Gonzalez eta Uranga oso sendo azaldu ziren Goitiaren eta Iturralderen aurka, 30-22 irabaziz. Partiduaren ekuatorera artean, berdintasuna nabarmendu zen, baina bigarren zatitik aurrera Iturralderen mailak behera egin zuen; hori zela eta, Goitiak lagundu egin gura izan zion, eta arriskuak beregain hartu zituen. Dena dela, ez zen nahikoa izan, Gonzalez eta Uranga uneoro seguru eta indartsu agertu zirelako.
Azkenengo partiduak Agirre eta Diazek osatutako bikotea Gonzalez de Mataukok eta Bailok osaturikoaren aurka ipini zuen. Markagailuak erakusten duena baino erraztasun handiagogaz nagusitu ziren Gonzalez de Matauko eta Bailo; hain zuzen ere, 25-30 irabazi zuten, baina une batean ere ez zuten ahuleziarik erakutsi, eta partidu osoan zehar Agirreren eta Diazen gainetik agertu ziren.
Hurrengo jardunaldiari begira, antolatzaileek adierazi dute “ez dela hautagai argirik egongo”: “Txapelketa honen alderdirik politena da, galduta ere, edonork duela puntuak egiteko eta, azkenean, arriskutsu izateko aukera. Horrenbestez, gaur-gaurkoz, ez dago hautagai nagusirik”.
