Beteranoen trinkete txapelketako finalistak, argituta
Goitia-Foster eta Etxe-Gandiaga bikoteek jokatuko dute Lekeitioko trinketeko beteranoen XVII. ekitaldiko final handia. Domekan izango da, 10:00etan hasita.
Argazkia: Lekeitioko Akarregi Pilota Kirol Elkartea. Goitia-Foster eta Etxezarraga-Gandiaga bikoteek jokatuko dute Lekeitioko Trinketeko Beteranoen esku pilota txapelketako XVII. ekitaldiko final handia. Finalerdietan lehia estua eduki ondoren, datorren domekan [martxoak 26] amaituko dute txapelketa; finala 10:00etan hasiko da, Lekeitioko trinketean.
Goitia eta Foster lekeitiarrek Gandiaga eta Madariaga eibartarrak finalerdietako itzuliko partiduan garaitu ondoren lortu zuten finalerako txartela, eta sasoi puntu bikainean ailegatuko dira azken norgehiagokara. Goitia aurrelari lekeitiarra izan zen, hain zuzen, protagonista nagusia: hamabost tanto egin zituen sakez. Abilezia hori probestu beharko du final handian ere. Gandiagak eta Madariagak, Goitiaren ekina gorabehera, gogor eutsi zioten finalaurrekoaren lehiari, eta 11-11 berdintzera ere iritsi ziren.
Dena dela, Goitiak eta Fosterrek martxa bat gehiago eman zioten partiduari, eta 11-25eko markagailua ezarri zuten. Azkenean, 13-30ekoagaz lortu zuten garaipena. Goitiaren lehen finala izango da; ez, ostera, Fosterrena, 2013an zein 2020an ere finalera heldu baitzen. Atzelaria, beraz, eskarmentuz jantzita ariko da bere hirugarren finalean.
Etxezarragaren lehen finala izango da, eta Gandiagaren bosgarrena
Bigarren bikoteari dagokionez, Etxezarraga berriztarrak eta Gandiaga berriatuarrak lanak eduki zituzten Telleria eta Berazaren kontra: 30-27 irabazi zuten. Finalerdia sendo abiatu zuten, 8-0 aurrea hartuz, baina Etxezarragaren erremateek eta airez sartutako jokaldiek min handia egin zieten. Bikote bietako bat ere ez zen gai izan markagailuan alde handirik egiteko eta, 28-26kora arte, parekotasuna oso nabaria izan zen. Azken esfortzu bategaz, Etxezarragak eta Gandiagak partidua poltsikoratzea lortu zuten. Lehenengoarentzat lehen finala izango da, txapelketako bere lehen parte hartzean; bigarrenarentzat, ostera, jarraian jokatuko duen trinketeko bosgarren finala izango da.
