Hezkuntzako hauteskunde sindikaletan LAB bozkatzeko eskatu dute Lea-Artibaiko hainbat herritarrek
Martxoaren 30ean egingo dira Hezkuntzako hauteskunde sindikalak. Horren harira, Hezkuntzan publikoko alor ezberdinetan diharduten Lea-Artibaiko hainbat herritar Markina-Xemeinen batu dira LABen aldeko bozka eskatzeko.
LABeko ordezkariek esan dute adostutako akordioaren arabera, martxoaren 30ean botoa eman ahalko dutela 2023ko urtarrilaren 31ra arte lanean zeuden guztiek. “Errolda orduan itxi zen. Beraz, orduan lanean zeuden guztiek eman ahal dute botoa”.
Besteak beste, ondoko zentroetako ordezkariak egon dira agerraldian: Lekeitio BHI, Bekobenta HLHI, Markina BHI, Atxondo HLHI, Iurretako Maiztegi HLHI, Gasteizko Mendizabala Lanbide Heziketa, Barakaldoko HLHI, Ikasbidea HLHI, Iurretako Lanbide Heziketa, Ermuko Anaitasuna ikastola, Etxebarriko haurreskolako hezitzaileak…
LABen aldeko botoa emateko arrazoiak ere eman dituzte:
- LABek Euskal Herriko langile guztien sindikatua izan nahi duelako.
- Sindikatu independentista, feminista, antiarrazista, ekosozialista eta euskalduna delako.
- Kontraboterea praktikatzen duen klase sindikatua delako. “Ez gara otzanak eta ez dugu lehentasun korporatiborik”.
- Akordioetara iristen dakitelako.
- Kalitatezko zerbitzu publiko eta lan baldintzen defentsan erreferenteak direlako, eskubide sozialen borrokan eragileak direlako eta lan mundua euskalduntzeko bultzada ematen dutelako.
Lea-Artibaiko Hezkuntzako hainbat ordezkari, LABen aldeko bozka eskatzeko agerraldian.
