101 udalerrigaz, 305.000 biztanleko lurgunea hartzen du Uemak
Etxebarria, Arrankudiaga-Zollo, Arruazu eta Doneztebe Uemako kide dira zapatuaz [martxoak 25] geroztik.
Uemak batzar nagusia ospatu zuen zapatuan [martxoak 25] Azpeitian, eta ekitaldi hori baliatu zuten 100 udalerriren langa gainditu dutela ospatzeko. Iraitz Lazkano Uemako lehendakariak esan zuen Euskal Herria euskalduntzeko bidean, udalerri euskaldunak «pauso gehiago emateko harrobia» direla. «Herri horiek, euskara indartzeko aukera ez ezik, bideak zabaltzeko ardura ere badute».
Bide horretatik, ezagutzaren alorrean emandako pausoak erabilerara eramateko «egiturazko erabakiak» hartzeko garaia dela aldarrikatu eta erakunde publikoei eredugarriak izatea dagokiela gogorarazi zien: «Herritarrek eman diguzuen ardurari erantzunez, zor dizuegu Euskal Herri euskaldunaren orubeak sendotzea».
Ekitaldiaren amaieran, Uemara batu diren azken lau herrietako alkateek hitz egin zuten, eta herritarren eta Uemaren ekarpena eskertu ostean, euskara lehenesteko, herritarren aurrean eredugarri agertzeko eta euskararen erabilera areagotzeko ilusioa eta lanerako gogoa agertu zuten.
Oro har, Uema bide urratzaile eta aitzindari izan dela adierazi zuten ekitaldian parte hartu zuten euskalgintzako zein erakunde publikoetako ordezkariek, eta adierazi zuten erdaren erauntsipean euskarak bigarren mailan ez geratzeko egiturazko neurriak eta erabakiak ezinbestekoak dituela.
