Elite Txapelketa finalera begira
Apirilaren 14an lehiatuko da finala; Gonzalez eta Uranga arituko dira norgehiagokan Aaron eta Bailoren aurka. IV. Berdel Txapelketako finalak, barikuan [martxoak 31] izango dira, 22:00etan.
Barikuan [martxoak 24] Mutrikuko Miruaitz pilotalekuan lehiatu ziren 2023ko Euskal Herriko Elite mailako Gizonezkoen Txapelketaren finalaurreko partidak; Aaronek eta Bailok osatutako bikoteak finalerako txartela lortu zuen, Gonzalez eta Urangarekin batera. Apirilaren 14an lehiatuko da finala.
Lehenik eta behin, Alberdik eta Atainek osaturiko bikoteak Aaron eta Bailok osaturikoaren aurka neurtu zituen indarrak. Partida estua izan zen, emaitzek ere hala adierazi zuten: 11-15, 15-12 eta 3-5. Urduritasuna nabari zen giroan, bereziki, Alberdi eta Atainen kasuan, hortaz, lehenengo setean urduritasunak aurrea hartu, eta Aaron eta Bailoren jokoa nagusitu egin zen 11-15eko emaitzarekin. Bigarren setean berriz, Alberdi eta Atain egonkortu egin ziren eta gutxika jokoa menperatzea ere lortu zuten, 15-12. Azken seta, berriz, estua izan zen, 0-3 joanda Alberdik etenaldia eskatu zuen, eta bueltan, 3-2 eta 4-3 ere joan ziren markagailuak, lau puntistek maila altua erakutsi zuten, eta azkenean, 5-3 amaitu zen lehia. Aaron eta Bailok partida ikusgarria eskuratu eta finalerako txartelarekin atera ziren kantxatik.
Bigarren partida gaziagoa izan zen. Urreisti eta Manzisidorrek norgehiagoka lehiatu behar zuten Gonzalez eta Urangaren aurka, baina ez zen horrela izan. Partida ondo hasi zen, mutrikuarrek maila ona erakutsi zuten eta partida menperatzen hasi ziren, baina markagailuan 14-10 ezarri zutenean ezbeharra etorri zen; Urreistik hanka bihurritu eta bertan behera utzi behar izan zuen partida. Bikoteak aukera handiak zituen finalean egoteko, baina amaiera gazia izan zuten. Hortaz, ikusleak zain izanik, Manzisidorrek partida bakarrik jarraitzea erabaki zuen, eta kantxara atera zen finalaurrekoari amaiera ematera. 14-15 bukatu zen lehenengo partida, 2-15, berriz, bigarrena.
Berdel txapelketa. Elite txapelketaz gain, Afizionatuen IV. Berdel Txapelketako gazte eta nagusi mailako finalerdien norgehiagokak hartu zituen Miruaitzek. Gazteen kategorian, Txanton-Aratz bikoteak eta Jokin-Xuban bikoteek lortu zuten final handirako txartela. Bestalde, nagusi mailako kategorian, Aitzolek eta Paulek osatutako bikoteak Egaña eta Argoitia izango ditu aurrez aurre. IV. Berdel Txapelketako finalak, barikuan [martxoak 31] izango dira, 22:00etan.
