Goitia eta Foster, garaile Lekeitioko Beteranoen Trinkete Txapelketan
Etxezarragaren eta Gandiagaren aurka 30-9 irabazita lortu dute txapela. Goitia izan da finaleko protagonista nagusia.
Goitia-Foster bikotea zen, aurreikuspen guztien arabera, Lekeitioko Beteranoen XVII. Trinkete Txapelketa poltsikoratzeko hautagai bikotea, eta, domekako final handian, ez duten kale egin: 30-9 menperatu zituzten Etxezarraga eta Gandiaga. Etxeko bikoteari, Goitia-Fosterri, izan zitzaion lehen sakea, eta hasiera-hasieratik faktore hori baliatu zuen. Izan ere, sakeei nahiz sake-errematei esker, partiduan interesatzen zitzaizkien egoerak sortu zituzten, eta markagailua 10-5eraino eroan zuten.
Gandiaga berriatuarra, azken hiru ekitaldietako txapelduna, partiduari eusten saiatu zen, baina gutxi egin ahal izan zuen. Goitia boteretsu agertu zen aurrealdean eta Foster, ostera, oso seguru, atzealdean. Tantoz tanto, lekeitiarrek beren bidea jarraitu zuten, eta, azkenean, malgutasunez lortu zuten garaipena: 30-9. Goitia izan zen partiduko izarra: pilotakada bakarra galdu zuen; 11 tanto lortu zituen sakez; 8 tanto, ostera, jokoz. Aurrelariak bere estreinako parte hartzean lortu zuen txapela janztea. Foster, aldiz, hirugarrenez aritu zen finalean, baina hark ere lehenengo txapela jaso zuen.
Lagunarteko giroan. Finala orduko, 3. eta 4. postuetarako partidua jokatu zuten Gandiaga-Madariaga eta Beraza-Egaña bikoteen artean. Gogor abiatu zuten partidua, baina hirugarren tantoan inflexio puntua iritsi zen: Gandiagak belauna bihurritu zuen, eta partidutik erretiratu egin behar izan zen. Une hartan, lehiaz kanpo baina erakustaldia eman guran, lagunarteko desafioa egitea adostu zuten pilotariek: Madariagak, bakarka, Beraza eta Egañaren aurka jokatu zuen. Sakez makina bat tanto egin ondoren, 30-22 irabazi zuen Madariagak.
