Mutrikuko ondare naturala berreskuratzeko proiektua abiatuko dute
Aranzadi Zientzia Elkartearekin batera diru laguntza bat lortu du Mutrikuko Udalak.
Mutrikuko Udalak ondare naturalaren berreskurapenerako lanak egiteko diru laguntza lortu du Aranzadi Zientzia Elkartearekin elkarlanean, hala nola, Mutrikuko “altxorrak” babestu eta sustatzeko: “Mutrikuk baditu hainbat natura altxor; iratze paleotropikalak, artadiak, kostako habitat naturalak, duna eta paduretako espezie bereziak, tartean”. Bereziki, iratze paleotropikalak eta artadiak babestu eta sustatzeko lortu dute diru laguntza, zehazki, 68.177,80 eurokoa.
2023-2024 artean burutu behar dituzte lanak. Proiektua aurrera eramateko Azainerreka inguruan 6 hektareako lursail bat erosi dute: “Degradatuta dagoen partzela bat da, landare exotiko inbaditzaile ugari daude eta landarediaren estaldura eskasa da eremu batzuetan”. Proiektuaren helburua izango da “berez egon beharko litzatekeen” basoa leheneratzea.
Udaberrian espezie exotiko inbaditzaileak lursailetik aterako dituzte, beste eremu batzuk inbaditzea ekiditzeko asmoz. Hain zuzen ere, lursailaren mugan dagoen Woodwardia radicans iratze paleotropikalaren kartografia zehatza egingo da. Aipatutako espeziea Arriskuan dauden espezieen Euskadiko Zerrendan dago, eta bakana kontsideratzen da. Ondoren, uda amaieran, urmaelak sortzeko baso lanak egingo dira. 2024. urte hasieran, berriz, artadia berreskuratzeko espezieak landatuko dira.
Urmaelak. Lursailean bi urmael sortuko dituzte, eta egiteko moduagatik, bilakaera ezberdina izango dute ur hartzeari dagokionez. “Ingurumenaren sentsibilizazio lantzeko trena gisa baliatuko dira”. Azkenik, bi irteera antolatuko dituztela aurreratu dute; bata, artadiko espezieen landaketak egiteko, eta bestea, urmaeletarako.
