Markina-Xemeingo suhiltzaileek ponpa-ibilgailu berria dute
Bizkaiko Foru Aldundiak 400.000 euro inbertitu ditu Bizkaiko Prebentzio, Suhiltzaile eta Salbamendu Zerbitzuko flotaren berrikuntza “indartzeko”.
Mota horretako kamioia 1992az geroztik aldatu barik zegoen Markina-Xemeingo suhiltzaileen parkean. Duela gutxi batzuk heldu da berria eta Lea-Artibai eskualdeko udalerriei zerbitzua emateko erabiliko dute. Lur orotako basoko ponpa-kamioi astuna da, merkatuko azken teknologiez eta autobabeserako sistemez hornitua. Kamioi berriak 4×4 trakzioa eta hiru pertsonarentzako kabina ditu, eta 4.000 litroko edukiera erabilgarria du; horietatik 500 litro autobabes-sistemarako gordetzen dira.
“Lur orotan jarduteko bere ezaugarriei esker iristeko zailak diren lekuetara iristen da, baso-suteak gertatu ohi diren lekuetara, eta sua itzaltzeko dispositiboko baso-talde eta suhiltzaileei lurreko laguntza ematen die. Bigarren mailako jarduera moduan landa-ingurunean ezbeharrak neutralizatzen lagunduko du”, adierazi dute.
Trakzio integraleko ibilgailu berriak hiru pertsona garraiatzeko kabina du, aire konprimitu arnasgarriko sistema batekin, bidaiariei “arrisku handiko” egoerei aurre egin ahal izateko aukera eskainiz. Gainera, plastiko indartuz egindako eta beira-zuntzez indartutako zisterna bat du, 4.000 litroko edukierakoa, eta horietatik 500 litro berariaz kamioiak duen autobabes-sistemarako gordetzen dira. Ibilgailu berria 6,3 metro luze da eta 14.300 kilo pisatzen du.
Segurtasuna. Ibilgailua erosteko 400.000 euroko inbertsioa egin dute, eta horrekin, Bizkaiko Foru Aldundiak “indartu” egiten du Prebentzio, Suhiltzaile eta Salbamendu Zerbitzuko flota berritzea. Baso-autoponpa astun berriak hainbat babes-elementu ditu suhiltzaileen segurtasuna bermatzeko: ibilgailu berriak iraulketaren aurkako kanpoko egitura du, iraultzeko arriskuaren alerta-sistema bat eta segurtasun-neurri gehigarri gisa ibilgailuak auto-babeserako sistema bat ere badu bidaiarientzat.
