Miren Agur Meabek bere ibilbide poetikoa balioetsi du euskaltzain osoko harrera ekitaldian
Euskara eta literaturaren ateak zabaldu zizkioten pertsonak omendu nahi izan zituen zapatuko [apirilak 22] herriko baselizan eskainitako irakurraldian.
Argazkia: Lekeitioko Udala. 2022ko otsailaren 25ean, Euskaltzaindiak euskaltzain oso izendatu ostean Miren Agur Meabe ofizialki da Euskaltzaindiako euskaltzain oso zapatuan [apirilak 22] harrera ekitaldia egin eta sarrera hitzaldia irakurri ostean. Lehendabizi, Lekeitioko Udaletxeko pleno aretoak Euskaltzaindiako osoko bilkura hartu zuen eta gero, bertako ordezkariek eta bestelako agintariek, besteak beste, Andres Urrutia euskaltzainburua, Koldo Goitia Lekeitioko Alkatea, Elixabete Etxanobe herri administraziorako eta erakunde harremanetarako foru diputatua eta Lorea Bilbao Euskara, kultura eta kirola foru diputatua herriko basilikarako bidea hartu zuten.
Hain zuzen ere, Meabek lore-eskaintza egin zion Resurrecion Maria Azkueri, lehen euskaltzainburua basilikan bertan baitago hilobiratuta. Gero, euskaltzain oso izendatu zuten Eusebio Erkiaga eta orain, Meabe, beraz, hirugarren lekeitiarra da. Protokoloak agintzen dituen bestelako hitz eta aurrekarien ostean, Itsaso bete mezu sarrera-hitzaldia irakurri zuen idazleak. Bertan, itsasoak bere ibilbide poetikoan izan dituen agerpideez mintzatu zen, poema zatiak oinarritzat hartuta. Euskara eta literaturaren ateak zabaldu zizkioten pertsonak omendu nahi izan zituen irakurraldian: herriko basilikan eginiko lehen irakurketak Labayru, Xabier Kintana, Eusebio Erkiaga… izan zituen hizpide, besteak beste.
Meabek hamahiru puntutan laburbildu zuen berbaldia: Bizi-aroen portua; Arranegi versus Goikokalea; Hondartza, prisma bat; Orografiari buruzko apunteak; Itsas zoologiaren lagin batzuk; Oinarrizko gastronomia; Kresala, pasioaren perfumea; Itsasoa, doluaren gordailu; Genealogia femeninoaren ozeano horiek; Ur-mitoen gazitasunaz; Tresnak: belak, arrauna, amuak eta mapak; Itsas belarrien bilduma; Sormenaren ur irauliak; Harea, arbel eta lehengai.
Argazkia: Lekeitioko Udala.
Castillo Suarez euskaltzain osoak eman zion erantzuna Galtzearen arteaz testuagaz eta Meaberen poetikaren nondik norakoak azaldu zituen: “Galerei aurre egiteko idazten du Miren Agur Meabek. Agur esateko ere bai. Negar egiten du galerei neurria hartzeko. Idatzi egiten du gaitzetik ateratzeko. Baina, batzuetan, ez dago mina arintzerik, boligrafoak ez daki bereizten zer den lehenago, negarra edo mina, idatzia edo sentitutakoa, nahigabea edo gonbitoa. Batzuetan bihozmina biderkatu eta oinaze bihurtzen da, gainera. Orduan, nahiago du gorputzik eduki ez, eta testu hasikin bihurtu, esaldi mataza, ohar kaier. Finean, idaztea galtzen eta erratzen ikastea da”.
Azkenik, euskaltzain berriak karguaren zina egin zuen: “Euskaltzaindiaren xede eta helburuei eta euskaltzain izateari dagozkien eginkizunak zintzo eta leialki beteko ditudala neure hitza ematen dut”. Ostean, euskaltzain osoaren domina, diploma eta ikurra jaso zituen Meabek euskaltzainburuaren eskutik, eta andreen aurreskuak eman zion amaiera ekitaldiari.
Lekeitioko Udaletik Meabe herritarra zoriondu nahi izan zuten eta herriari emandako guztiagatik eskerrak eman. Oroigarri gisa, Lekeitioko ondarearekin lotura handia duen eguzki dantzan erabiltzen den mantoia oparitu zioten. Iaz, gainera, ‘ohorezko herritar eta alaba kutun’ izendatu zuten.
