Demi Volleringek irabazi du Etxebarria eta Markina-Xemein arteko Itzulia Womeneko lehen etapa
Gaur [maiatzak 12] munduko txirrindularirik onenek hartu dituzte Lea-Artibaiko errepideak. Eikaren 50. urteurrena dela eta, kooperatibako sortzaileek eman diote hasiera etapari.
Euskal Herrian dagoen txirrindularitzarekiko pasioak mugak zeharkatzen ditu, denek lehiatu nahi dute bertan, onenek. Hain zuzen ere, emakumeen tropeleko bi izar nagusiak Etxebarriko irteeran izan dira: Demi Vollering Itzulia Womeneko iazko garailea eta Annemiek Van Vleuten munduko txapelduna. Eguraldiak eten txiki bat, eguneko bakarrenetarikoa, eduki du gaur [maiatzak 12] Eikako egoitzako irteeran. Duela 50 urte kooperatiba sortu zuten emakumeek eman diote hasiera lasterketari; aurreskua dantzatuz eta guzti omendu dituzte, eta txalo zaparrada jaso dute.
Bestelako zaparradak tropelak jasan ditu eskualdeko errepideetan. Agian horregatik ohi baino denbora gehiago gehiago behar izan dute eguneko ihesaldia egiteko. Ereñora heldu aurretik alde egin du multzo handitik Massic Tactic etxeko Miryam Nuñezek. Ekuadortarrak 45 segundoko aldea lortu du, baina pixkanaka aldea murrizten joan da, eta Arratzura heldu aurretik harrapatu dute. Gero, Bepink taldeko Giorgia Vettorello ihes egiten saiatu da, baina ezeresean geratu da saiakera.
[IKUSI ARGAZKI GALERIA ZUZENEAN]
Gontzagarainagako mendatera arte ez ziren lehendabiziko tarteak zabaldu. Niamh Fisher-Blackek jaso ditu Mendiko Sariko lehen hiru puntuak. Aldats behera Aurela Nerlokek eta Anna Kiesenhofer Polinpiar jokoetako txapeldunak alde egin zuten, baita bidea egin ere 50 segundoko tartea zabalduz. Baina, espero bezala, Urkaregiko igoerak ezarri du legea, indartsuenek hartu dute aurrera.
Lehen maldetan alde egin du Vollerin faboritoak, ez zuen itxaron nahi sailkapenean aldeak zabaltzeko. Atzean geratu dira Marlen Reusser taldekidea, Van Vleuten beste hautagaia eta Katarzyna Niewiadoma. Kilometroak aurrera joan ahala iazko txapeldunak tartea zabaltzen joan da, eta Urkaregiko gainean 50 segundo atera dizkio atzekoei. Bakarrik eta behar bezala ospatu ahal izan du garaipena Markina-Xemeingo helmugan bi besoak altxatu ditu. Garaipen honekin Volleringek Itzulia Womeneko etapa guztiak irabazi ditu, iazko hirurak eta aurtengo lehendabizikoa.
47 segundora heldu da Reusser taldekidea bigarren postuan, hirugarren Niewiadoma izan da 49 segundora eta 51 segundora heldu dira Van Vleuten eta Olivia Baril. Horrenbestez, sailkapen nagusian Vollering da lider berria. Bihar [maiatzak 13] bigarren etapa jokatuko dute. Araban ariko dira: Gasteizen hasiko da saioa, eta Amurrion bukatuko, 133,2 kilometro egin ondoren. Azkena, etzi [maiatzak 14] Donostian amaituko da.
