BBK Live jaialdia Lekeitiora helduko da 'Herrian' ekimenaren bidez
“Helburua da kaleak dinamizatzeaz gain, kultura hain eskura ez dagoen tokietara eta kultur edukien eskaintza txikiagoa duten tokietara hurbiltzea”, adierazi dute.
Argazkia: Lekeitioko Udala Ekainaren 3an helduko da jaialdia Lekeitiora, herriko plazara, Tala eta Kofradia aurrera, zehazki. 13:00etan hasiko dira kontzertuak eta 23:00etan amaituko dira, doako ekintza da. 15 talde izango dira oholtzara igoko direnak: Airu, Lorena Alvarez, Aviador Dro, Bengoa, Boye, Doctor Explosion, Los hermanos Cubero, Hofe x 4:40, Juantxo Skalari, Karmento, Micky & The Buzz, Montana, Nogen, Silitia eta Tapia eta Leturia.
2006an Kobetamendin sortu zenetik, BBK Live jaialdiak “etengabeko bilakaera” izan du. 2011n Bereziak ekimena jarri zuten martxan hiriaren erdialdean, 2017tik aurrera Hirian dinamikak Bilboko auzoetara eramaten ditu kontzertuak eta orain Bizkaiko herrietara zabaldu dute. Herrian ekimenaren bitartez “balioa” eman nahi diete herriei , hauekin “konektatzen” diren bitartean. “Jaialdiak urtez urte izan duen bilakaeraren ondorioz, kulturaren eta gizartearen arloak gainditu eta haratago begira jarri da”.
Hain zuzen ere, BBK-k eta Kreatibo Industria Fundazioak herrietako kultura “aberastea” du helburu “tresna kultural eta soziala” den bitartean. Musikagaz, kulturagaz eta aniztasunagaz “konpromiso sendoa” dutela esan dute: “Proiektu sozial horren xedea esperientzia paregabea sortzea da, jaialdiaren mugak gainditu eta aldaketa sozialaren nahiz kultur aberastasunaren katalizatzaile bihur dadin, herritarrei balioa eskainiz”.
Argazkia: Lekeitioko Udala
Gorka Martinez BBKren zuzendari nagusiak Herrian ekimenaz esan du “aurten, beste urrats bat” eman nahi izan dutela: “Jaialdiaren esentzia gure herrietara eraman nahi dugu. Eta horretarako da Herrian: jaialdi ibiltari bat, Bizkaiko hainbat herritako biztanleei kultura musikaren bitartez hurbilarazteko. Ekimenaren bitartez, egungo musika-proposamenak eta tokian tokiko talentua indartu nahi ditugu, bizkaitar gizartearen aniztasunaz sentsibilizatzeko esparrua izan dadin nahi dugu, betiere euskararen erabilerari eta genero-identitateari ere balioa emanez. Eta, hori guztia ekitaldi irisgarri eta jasangarri baten esparruan; askotariko eskaintza izango du, hala nola tailerrak eta Km0 gastronomia-eskaintzak, tokian tokiko eragileekin elkarlanean antolatuta”.
