EH Bilduk Lekeitioko “norabide aldaketaren beharra” azpimarratu du
Zapatuan [maiatzak 20] koalizioak hauteskunde kanpainako ekitaldia nagusia egin zuen, Eskolapean.
Ander Aldazabal herriko alkategaiaz gain, Iker Casanova Bizkaiko Foru Aldundirako hautagaiak ere parte hartu zuen zapatuko [maiatzak 20] ekitaldian. Hain zuzen ere, biek ala biek aldarrikatu zuten “EAJk eskaintzen duen paralisiaren eta eredu agortuaren aurrean”, EH Bilduk proposamen “berri eta iraultzaileak” dituela.
Aldazabalek esan zuen “oso kezkatuta” dagoela Lekeitiok hartutako norabideagaz eta “herritarren interesak erdigunean” jartzeko konpromisoa agertu zuen. “Gure helburua zaintzen duen herri bat da. Lehentasuna da tokiko merkataritza eta ostalaritza sustatzea, hau da, herriaren bizitza sustatzea”. Horrez gain, “desberdintasun sozialekin” amaitzeko deia egin zuen baita zaintzak “erdigunean” jartzeko ere. “Lekeitio beti izan da langile kontzientzia handiko herri arduratsua; herri bizia, borrokalaria, konprometitua, eta euskera beti ahoan, harro sentitu dena bere izanagaz. Gure aurretik herri honen alde hainbeste egin dutenengatik, atzetik datozenengatik, eta zelan ez geugaitik… tenka diezaiogun gogor aldaketaren txikotari. Ezkerretik, feminismotik eta euskaraz, Lekeition aldaketa. Hauxe da momentua!”.
Bestalde, Casanovak nabarmendu zuen garraio publikoa bultzatuko duela, “lurralde osoa konekta dezan, eta maiztasun askoz handiagoagaz”. Gaineratu zuen egungo agintariek “enpresa handien, eliteen eta gutxi batzuen interesen aldea” lan egiten dutela eta EH Bilduk “bizkaitar guztien alde” lan egingo duela “langile guztiena, emakumeena, adinekoena, gazteena”.
Ander Aldazabal alkategaia, Iker Casanova Aldundirako hautagaia eta herriko zerrendako kideak, ekitaldian. Argazkia: Lekeitioko EH Bildu.
