Eskubideak betetzeko aldarrikatu du desgaitasuna duten pertsona talde batek
Bihar [maiatzak 24] dokumentuaren aurkezpena egingo dute Gasteizen. Dokumentu eta aldarri horren atzean dagoen pertsona taldean dago Karmele Antxustegi ondarrutarra.
Desgaitasunen bat duten pertsona talde batek beraien herritartasun osoa bermatzen duten legeak betetzea eskatzen duen dokumentua kaleratuko du bihar [maiatzak 24], 11:00etan, Gasteizko Andra Mari Zuria plazan. Dokumentu eta aldarri horren atzean dagoen pertsona taldean dago Karmele Antxustegi ondarrutarra.
Antxustegik zehaztu duenez desgaitasun ezberdinak dituen jende talde bat batu da, dokumentu bateratu bat kaleratzeko: “Oinarrian hutsune berdinak ditugula ikusi dugu, horregatik egin dugu dokumentu kolektiboa”. Horren aurrean, eskaera zehatza egin dute: indarrean dagoen legedia betetzea. “Arlo bakoitzean etengabeko gerra bat dugu; hezkuntzan, osasunean… Eskubideak ditugu, baina ez dira betetzen. Hortaz, sistemak eskubide horiei benetako erantzuna ematea nahi dugu”.
Karmele Antxustegi: “Kargu publikoei oso merke ateratzen zaie desgaitasunak dituzten pertsonak, gainerako herritarrek dituzten ondasun eta aukerak eskuratzetik kanpo uztea”
Desgaitasuna duten Pertsonen Eskubideen Nazioarteko Konbentzioa behin eta berriz urratzen dela zehaztu dute, eta horren aurrean, inolako erantzukizunik ez dagoela diote. “Kargu publikoei oso merke ateratzen zaie desgaitasunak dituzten pertsonak, gainerako herritarrek dituzten ondasun eta aukerak eskuratzetik kanpo uztea”. Egunero jasaten dituzten egoeren berri ematen dute, hala nola, hezkuntzan laguntzarik ez edukitzea, osasun zentroetan irisgarritasuna eta komunikazioa ez bermatzea, tratu txar normalizatu eta iraunkorra, kolektiboan indarkeria matxistaren ikusezintasuna, garraio publikoaren irisgarritasun eza, lan merkaturako sarbide eza…
Egoera horren aurrean erantzukizunak eskatzen dituzte, “politikoek kontuak eman ditzatela; desgaitasuna dugun pertsonak herritarrak gara eta bozkatu egiten dugu”. Hortaz, mezua maiatzaren 28ko udal eta foru hauteskundeetan parte hartuko duten hautagaiei zuzenduta bideratuko dute: “herritartasun osoa bermatzen duten legeak bete eta betearaz ditzatela”.
