Hamaikatxu taldeak irabazi du Lekeitioko Iparraldeko Haizeak jaiko gisatu txapelketa
Aittitta Txiki kultur elkarteko kideek barikuko [maiatzak 19] eta zapatuko [maiatzak 20] “giro polita” nabarmendu dute.
Bertso saioa. Argazkia: Aittita Txiki kultur taldea 21. Iparraldeko Haizeak jaiak hiru egunetik bi egunera pasa den arren, bere arrakasta mantendu du. Hain zuzen ere, Aittitta Txiki kultur elkarteko kideek asteburuan edukitako “giro polita” nabarmendu dute. Aurreikusitako eguraldi euritsuaz “beldur” baziren ere, azkenean eguzkia lagun izan zuten. Gisatu txapelketak Lekeitioko txoko guztiak hartu zituen, taberna inguruak eta plazaz gain, Eskolapea eta portuko hainbat tokitan ere kokatu ziren parte hartzaileak. 19 gisatu aurkeztu ziren azkenean. Denen artean onena Hamaikatxu taldearena izan zen, bigarren Muga izan zen eta hirugarren Tia Fran.
Eguraldi ona ikusita, asko izan ziren herrira arte hurbildu zirenak. Beste urte batez jaiko izar nagusietako bat Iparraldeko eta Hegoaldeko produktuen azoka izan zen, hamabi eta 28 postu jarri zituzten, hurrenez hurren; guztira 40. Denetariko produktuak eskaini zituzten. Horrez gain, antolatzaileek Baigorriko Arrola eta Markina-Xemeingo Zerutxu dantza taldeen kalejira nabarmendu dute. Ikastolatik hasi ziren eta plazan gaitero eta txistularien laguntzagaz dantza emanaldi “bikaina” eskaini zuten. Irai taldearen kontzertuak eta Orkresta elektrotxarangaren musikak eguna luzatzeko erabili zuten bertaratutakoek.
Ipar Arrindaren ardi eskilatze erakusketa. Argazkia: Aittita Txiki kultur taldea
Arrakastatsua. Barikuan [maiatzak 19], beste urte batez, bertso saioa izan zen protagonista nagusia. 200 pertsona elkartu ziren plazan “maila altuko” bertsoetaz gozatzeko. Kultur taldekoek batez ere gazteen “prestutasuna” eta gai jartzailearen “gai landuak” nabarmendu dituzte.
