Asteburuan aire zabaleko diziplina desberdinetako probak lehiatu dituzte Basaurin.
Lekeitioko Tximista atletismo taldeak eta Durangoko kirol taldean dauden Lea-Artibaiko kirolariek domina asko eskuratu dituzte Bizkaiko Atletismo Txapelketan. Guztira hamabi domina lortu dituzte: urrezko hiru, zilarrezko sei eta brontzezko beste hiru.
Jauziei dagokionez, Tximistako Ines Lauzirika eta Naia Garetxana protagonista handiak izan dira. Jauzi hirukoitzean Lauzirikak lehen postua lortu zuen 12,01 metroko jauziagaz, eta Garetxana laugarren izan zen 1,77 metrokoagaz. Jauzi luzaeran Garetxana bigarren izan zen 5,48 metrogaz, eta hirugarren Lauzirika 5,29 metrogaz.
Argazkia: Juan Sampedro
Sarai Larrinaga etxebarritarrak ere emaitza bikainak lortu ditu, bi zilarrezko domina lortu zituen, pisuaren jaurtiketan 11,47 metroko markagaz eta diskoan 39,65 metroko jaurtiketagaz. Pertigan Tximista taldeko Aiora Pikabea hirugarren geratu zen pertigan 2,30 metroko markara iritsiz. Altueran emaitza bera lortu zuen Paul Lauzirikak, 1,80 metrotara helduz.
Lasterketetan lortu zituzten eskualdeko atletek emaitzarik onenak. Paule Garcia lekeitiarrak urrezko domina eskuratu zuen 3.000 metroko lasterketan 11:03:73ko denboragaz. Nahia Ibarzabal markina-xemeindarrak ere lehen postua eskuratu zuen 5 kilometro martxako diziplinan. 1.500 metroko lasterketan Markina-Xemeingo Izaro Aranburuk bigarren postua lortu zuen 4:55:01eko denboragaz. Abiadurakoetan, Ainara Plaza bigarren izan zen 800 metroetan 2:20:08ko denboragaz, baita Olatz Martiartu ere 400 metroetan 1:07:02ko markagaz.
Argazkia: Juan Sampedro
