Markina Shots jaialdiak "hitzik gabe" utzi ditu ikusleak
Antolatzaileek jaialdiaren balorazio “oso ona” egin dute. Laster iragarriko dituzte datorren urteko datak.
Los Panicks taldearen kontzertua. Argazkia: Markina Shots Markina-Xemeingo herriari eskerrak emateko modu batez hasi zena, herriko egutegiko hitzordu finkoetako batean bilakatu da. 18. Markina Shots jaialdiak beste urte batez markak hautsi ditu. Jaialdiak pixkanaka gero eta garrantzia handiagoa hartzen doa eta hori nabaria da. Adibiderik onena musika taldeak dira, deiak egin beharrean deia jasotzen dituzte antolatzaileek. Aurten “hitz barik” utzi dituzte asko.
Eguenean [ekainak 8] herritarrek “oso ondo” pasatu zuten The Daltonics taldearen kontzertu ibiltarian, “abestien letrak bertaratutakoen barreak eragin zituen, baita dantza egiteko gogoak handitu”. Barikua [ekainak 9], berriz, Orkresta Elektrotunak ez zuen hutsik egin eta “giro paregabea” sortu zuen “helduak zein umeak dantzan jarri zituzten”. Ondoren, ondo atera zitzaien Mocker’s taldearen lurreko kontzertuak hurbiltasun gehiago lortzeko: “kontzertu paregabea eman zuten eta ikusleen zoramena ekarri zuen”.
Zapaturako [ekainak 10] onena utzi zuten eta “arrakasta itzela” izan zela esan dute. Korribeer formatu berrian zortzi taldek parte hartu zuten eta irabazleak Julen, Josu eta Alex izan ziren. Los Paniks bermeotarrak izan ziren ikusleak berotzeko arduradunak. Ostean, Mourm taldeak jo zuen: “Talde hau ekartzea antolatzaileon apustua izan zen eta erabat bete zuten espero genuena, kontzertu bikaina egiteaz gain beraiekin izan genuen tratua oso ona izan zen. Jende askok esan zigun talde hau aurkikuntza bat izen dela”. Talde izarra, berriz, Los Mambo Jambo zen, eta horiek ere ez zuten hutsik egin. “Kartel buru zen taldeak titulu hori zergatik zuen erakutsi zuen. Hitzik gabe geratu zen jende asko, paregabeak eta jende guztia pozik dantzan jarri zituzten”.
Orkestra Elektrotula Markina-Xemeingo kaleetan. Argazkia: Markina Shots
Antolatzaileek eskerrak eman nahi izan dizkiete herritarrei eta laguntza eman diete elkarte taberna edota dendeei. Era berean, aipamen berezia egin nahi izan diete Bogako garagardoegileei, “barikuan eta zapatuan garagardo desberdinak dastatzeko aukeragatik”.
Horrez gain, lanean daude hurrengo Markina Shots jaialdia antolatzen. Aurreratu dute datorren asteetan iragarriko dituztela datorren urteko datak eta talde batzuekin hitz egiten daudela.
