Artibai Futbol Taldeak Artibai Eguna ospatuko du bere 40. urteurrenean
Zapatuan [ekainak 17] egun osoko egitaraua antolatu dute, "herrian eta herritarrentzat".
Ez dira egunero 40 urte betetzen eta hori ondo baino hobeto dakite Artibai Futbol Taldekoek. Berez, irailean da urteurrena, baina klubeko zuzendaritza taldekoek urte osoan ekintzak antolatzeko ideia zeukaten buruan. Gainera, ekainaren 30ean zuzendaritza aldaketa izango da, uztailean berria sartuko da, eta data aproposa izan daitekelakoan aukera dute zapatua [ekainak 17]. Hala ere, irailean beste ekintza nagusiren bat egingo dutela aurreratu dute klubetik, baina oraindik ez dute zehaztuta zer izango den.
Argi izan dutena izan da Artibai Eguna “herrian eta herritarrentzat” egin nahi zutela. Hain zuzen ere, Artibai FT Barroeta futbol zelaitik “atera” nahi izan dute, eta “futbola ez den bestelako ekintzak” antolatu. Hau da, ohiko egitarautik aldendu nahi izan dute. Herritarrengandik “erantzun oso ona” jaso dutela esan dute eta “giro polita” izango dela uste dute, batez ere “eguraldia lagun” badute. Hain zuzen ere, Artibai Eguneko zereginetarako bolondres deialdia zabaldu zuten eta erantzun “bikaina” jaso dute. 40 lagun baino gehiagoren laguntza izango dute.
Artibai FT herrira hurbiltzeko helburu horretan, adin guztientzako ekintzak antolatu dituzte. Adibidez, gazteen artean badaude palan aritzen direnak eta 10 eta 18 urte bitartekoentzako pala txapelketa jokatuko dute frontoi txikian. Eguerdian txahal pintxo dastaketa egongo da eta klubekoek txosna jarriko dute edaria eskaini ahal izateko. Gainera, egun osoan frontoi handiko lehen solairuan taldearen 40 urteko ibilbideko argazkiak, garaikurrak edota kamisetak egongo dira ikusgai.
Era berean, Artibai Egunera taldeko kamiseta janzteko deialdia zabaldu nahi izan dute eta herritar denak gonbidatu dituzte urteurreneko jai giroaz gozatzera.
Egitaraua:
- 10:00: Ume eta gazteentzako pala txapelketa frontoi txikian.
- 12:00-14:00: Batukada herrian zehar.
- 12:30: Txahal pintxo dastaketa plazaberripean.
- 17:00-19:00: Puzgarriak liburutegi aurrean ume eta gazteentzako. Euria da, frontoi handian.
- 20:00-22:00: Elektrotxaranga herrian zehar.
- Egun guztian zehar: Artibaiko argazki historikoen erakusketa egongo da frontoi handiaren lehen solairuan.
