Martxan dago Lekeitioko San Antolin jaietako kartel lehiaketa
Lanak aurkezteko azken eguna uztailaren 9a da, 21:00etan. Garaileak 500 euroko saria irabaziko du.
Oraindik hilabeteak falta dira San Antolinak ospatzeko, baina Jai Batzordea eta Lekeitioko Udala lanean daude: San Antolin jaietako kartel lehiaketa jarri dute martxan. Zelan ez, derrigorrez, kartelean ‘San Antolinak 2023’ eta ‘Lekitto’ agertu beharko dira baita jaiei lotutako berezitasunen bat ere. Epaimahaiak baztertuko ditu herriko jaiekin zerikusirik ez duten lanak. Horrez gain, testuak euskaraz egon beharko dira.
Teknikari dagokionez, edozein erabili daiteke eta kartelak euskarri digitalean aurkeztu behar dira: PDF edo JPG formatuan, 21 zm-ko zabaleragaz eta 20 zm-ko altueragaz eta gutxienez 300 ppp-ko bereizmenagaz. Kartelagaz batera lelo edo esaldi bat jarri beharko da. Gainera, egilearen hurrengo datuak jarri beharko dira: izen-abizenak, helbidea eta telefono zenbakia.
Uztailaren 9an 21:00etan amaituko da lanak aurkezteko epea. Horretarako, kartela eta datuak kulturetxea@lekeitio.eus posta elektronikora bidali behar dira. Egileek nahi beste kartel aurkez ditzakete, baina kartel bakoitzak bere lelo edo esaera propioa izan behar du. Uztailaren erdialdean emango dute jakitera kartel irabazleak. Garaileak 500 euroko saria irabaziko du.
“Lanak lehendabizi, Emakumea eta Berdintasun zerbitzuak ikusiko ditu, hauek genero ikuspegia errespetatzen dutela bermatzeko. Ondoren, baztertuak izan ez diren lanen artean, Jai Batzordeak irabazlea aukeratuko du”, azaldu dute.
