Badator Lekeitioko kaleetara 33. Kaleka
Aurten barikutik [uztailak 7] domekara arte [uztailak 8] ospatuko dute eta hamaika konpainiak eskainiko dituzte beren ikuskizunak.
Lekeitioko 33. Nazioarteko Arteen Jaialdiaren barikuan [uztailak 7] ekingo dio, antolatzaileek esan dutenez, herritar zein bisitariak “harrituta” utziko dituen egitarauagaz. Kale arteetako alor desberdinak landuko dituzten ikuskizunak bizi eta sentitzeko aukera egongo da, besteak beste, antzerkia, kalejirak, clownak, piroteknia, sormena sustatzeko espazioak edota gogoeta eragingo digutenak. Aurtengo hitzordua Hegan egiteko garaia lemapean iritsiko da: “Habiatik ateratzeko ordua heldu da, hegan egin eta erakusleiho berrietara heltzeko unea”.
Jaialdian parte hartzen duten konpainia zein kolektiboak deialdi baten bitartez aukeratuak izan dira: 406 lan aurkeztu ziren eta horietatik 10 izan dira aukeratuak. Horrez gain, garapen edo sorrera prozesuan dagoen konpainia baten lana ikusteko aukera ere egongo da. Euskal Herriko artistez gain, Portugal, Katalunia, Valentzia, Andaluzia, Gaztela eta Leon eta Gaztela-Mantxako lan eta ekintzak ikusi ahal izango dira. Hiru egunetan zehar hamaika ikuskizunez gozatu ahal izateko zazpi gune antolatu dituzte. Hiru lan lerroz ezberdinduta egongo dira lanak.
Kaleka Ofizialak sailean formatu ezberdinak lantzen dituzten konpainia eta kolektiboen lanak biltzen dira. Aurten, Haatik, Trapu Zaharrak eta Lekittoko Deabruak bezalako konpainiak hartuko ditu bere barnean atal honek. Horrez gain, Espainiar Estatuko Xa Teatre, Holoqué, David Cebrián, La Tal eta 7 Bubbles konpainiak egongo dira eta Portugalgo Projectos de Intervençao Artística konpainia.
Kaleka Scratch sailean garapenean edo sorrera prozesuan dauden lanak batzen dira. Aurten 25 eskaera jaso dira eta bat izan da aukeratua: Cía Trotamundos bizkaitarren lana, hain zuzen ere.
Azkenik, Kalekaz Blai sailean esperimentazioagaz eta ikusleen parte hartze zuzenagaz jolasten dute eta Baychimo konpainia izango da aurtengoan horretarako bidea egingo duena.
