San Pedro Jaietan murgilduta
San Pedro Jaietan murgilduta egon dira asteburuan Munitibarren, Arta auzoan, Berriatuan eta Lekeition.
San Pedro jaiak ez dira edozein jai bertoko zenbait udalerritan. Askotan asteburuagaz batera egin dituzte ekintza nagusiak Lekeition, Munitibarren, Ziortza-Bolibarko Arta auzoan eta Berriatuan.
Lea Ibarrako Motrollo Pilota Elkartekoak izan ziren Munitibarko San Pedro Jaiei hasiera emateko ardura izan zutenak. Ohi legez, zapatuko herri bazkariak jendetza pilatu zen, eta eguna jai giroan ospatzeko aukera izan zuten; Joselontxos txaranga eta Iratzar erromeria izan ziren giroa ezartzearen arduradunak. Domekan, berriz, zirkugintza tailerragaz gozatzeko aukera izan zuten frontoian, eta harrera ona izan zuen ekimenak.
Berriatuan kirola eta jai giroa uztartu dituzte. Barikuan, ia 60 lagun batu ziren frontoian egin zen umeen bazkarian; arratsaldean jolasak, aparra eta txokolatada izan zituzten. Zapatuan, berriz, txapelketak izan ziren protagonista. Goizean, triatloi herrikoia izan zen hitzordu nagusia. Eguerdian, berriz, tortilla eta entsalada txapelketa egin zituzten plazan; Anaitasuna Elkartea izan zen abilena entsalada egiten, Alaine berriz, tortilla txapelketan. Arratsaldean, bola txapelketa herrikoia ospatu zen eta Luken Martino nagusitu zen.
Iturria: Berriatuko Udala
Musika izan zen protagonista barikuan Lekeition, Eguzkilore jubilatuen abesbatzagaz hasi zen goizean, ondoren , Lekitto musika bandaren txanda izan zen. Irrintzi txapelketak harrera oso ona izan zuen, parte hartzaile kopuru handia izateaz gain, maila handia egon zela nabarmendu zuten antolatzaileek. Umeen artean eta erromeriak ere bere lekua izan zituen. Iria Zulaikak, Irati Belaustegik eta Zaloa Zabalak osatu zuten podiuma. Nagusietan, berriz, Aiala Callejak, Bakarne Oñederrak eta Izarra Aizpuruak. Zapatuan, berriz, jaiak agurtzeko unea heldu zen, San Pedrori eskainitako lora eskaintza, “Kilin Kala” igeri lehiaketa eta mus txapelketagaz.
Irrintzi lehiaketako irabazleak. Iturria: Lekeitioko Udala
Ziortza-Bolibarko Arta auzoan zapatuan galdu ezinezko hitzordua izan zuten, XI. Briska Txapelketa. Domekan, berriz, Zerutxu Dantza Taldearen emanaldiagaz gozatu zuten, eta ondoren, puntako bertsolarien saioz gozatu zuten: Nerea Ibarzabal eta Aitor Mendiluze izan ziren arduradunak.
