Markina-Xemein, Bizkaiko Herriartekoan nagusi
Markina-Xemeinek Bizkaiko Herriarteko Esku Pilota Txapelketa irabazi du, Barakaldon lehiatutako finalean Zaratamo menperatu ostean.
Argazkia: Markina-Xemeingo Esku Pilota Taldea. Markina-Xemeinek Bizkaiko herririk pilotazaleenetakoa eta pilotan hoberen jokatzen duenetako bat dela frogatu du beste behin: Bizkaiko Herriarteko Esku Pilota Txapelketan nagusitu da. Maiatz amaieratik uztail hasierara, pilotari markina-xemeindarrak indartsu agertu dira jokatu dituzten partidu denetan, eta erregulartasun bikain horrek lehiaketa poltsikoratzeko balio izan diote.
Lehen jardunaldia maiatzeko azkenengo astuburuan jokatu zuten, Sestaoren kontra. Joan-etorriko jardunaldia lehiatu zuten kadete, gazte eta nagusi mailan. Kadeteak Amets Alvarez eta Unax Ibarzabal izan ziren; gazteak, aldiz, Mikel Egurrola eta Markel Calvo; nagusiak, ordea, Josu Agirreamalloa eta Alain Pujana. Markina-xemeindarrek 3-0 irabazi zuten bai Sestaon, bai etxean. Garaipen horrek finalaurrekorako txartela eman zien, eta Zeanuri izan zuten aurkari, ekainaren 10ean eta 17an. Zeanuriri ere ez zioten ezustekorako inongo aukerarik eman; Markina-Xemeingoak finalera sailkatu ziren.
Finala joan den asteko barikuan [ekainaren 30ean] jokatu zuten, Barakaldoko pilotalekuan, Zaratamoren kontra, eta partidu bakarrera. “Tentsioa eta urduritasuna” nabaritu zirela adierazi dute Markina-Xemeingo Esku Pilota Taldeko ordezkariek: “Udalerri bietako jarraitzaileek frontoia ikuslez bete zuten; final gaitza izan zen”. Kadete mailan 22-13ko markagailuagaz galdu zuten, eta horrek hauspotu egin zuen presioa. Gazte mailan ere, gauzak ez zituzten erraz eduki: 9-1, 12-3 eta 20-15 galtzen joan arren, asmatu zuten partiduari buelta ematen. Azkenean, erakustaldi paregabearen ondoren, 15-22koagaz nagusitu ziren gazteak. Nagusi mailan, ostera, gauza askoz errazago eduki zituzten. “10-22koagaz irabazi genuen; nagusien artean, faborito ginen, eta hautagaitza hori ederto merezitakoa izan zela frogatu genuen”.
“Herriartekoa urtean zehar jokatzen ditugun txapelketetatik bereziena da”
Helburua beteta. Txapelketaren balorazio “paregabea” egin dute esku pilota taldekoek: “Urtean zehar jokatzen ditugun txapelketetatik bereziena da herriartekoa; pilotariek, beraien burua eta kluba ordezkatzeaz gain, herria bera ere bistaratzen dute. Oro har, txapelketako garaipenak egindako behar nahiz esfortzu guztiak bistaratu ditu”.
