Mutriku Natur Taldeak portuko obrak birplanteatzea eskatu du Legebiltzarrean
Lehenengo proiektua abiatu zenetik eta gaur egungo luzapen proiektuaren gelditzera arte egondako bilakaeraren berri eman zuten.
Mutriku Natur Taldeak portuko obrak birplanteatzea eskatu du Legebiltzarrean Mutriku Natur Taldeako Rafael Perez Beristain, Alberto Lejardi eta Iñigo Agirre elkarteko kideek Mutrikuko Portuaren Plan Bereziaren bilakaerari eta egungo egoerari buruzko txosten informatiboa aurkeztu zuten ekainaren 27an Eusko Legebiltzarreko jasangarritasun Ingurumen eta Ingurune naturalaren Batzordean: “Premiazko S.O.S. bat eskatu behar dugu Mutrikuko portuko obrak birplanteatzeko“.
Lehenengo proiektua abiatu zenetik eta gaur egungo luzapen proiektuaren gelditzera arte egondako bilakaeraren berri eman zuten: “Mutrikuko Plan Bereziko bi hamarkada hauek luzeak izan dira, proiektuaren sorreratik hasi eta egungo luzapen proiektuaren obrak arrazoi teknikoengatik eten diren arte. Irregulartasun teknikoz, legazez eta aurrekontuez betetako ibilbidea”.
Ibilbidean egondako mugarri batzuk aipatu zituzten, eta ondorio bat atera zuten: “Kalte handiegia egin zaio ingurumenari, ondareari eta paisaiari, eta, obrek aurrera jarraitzen badute, itzulerarik gabeko puntu batera iritsiko gara. Ezinbestekoa da proiektua erabat birplanteatzea”.
Mutriku Natur Taldearen ustetan Eusko Jaurlaritzak Mutrikun “kirol portu gehigarri bat” egin nahi du, “egiten ari diren lanak amaitzen direnean dike luzearen babesean”. Horrez gain, proposamenak eskatu zizkieten batzordeko kideek eta Natur Taldekoek argi erantzun zuten: “Dikea dagoen bezala uztea, metro bakar bat ere ez luzatzea, eta dikearen babesean espazio publikoa denon artean askatasunez partekatzea. Mutriku erreferente izan daiteke herritarrek itsasoarekin eta paisaiarekin duten harreman berri baterako”.
Hala ere, Mutrikuko portu historikoaren sarrera hobetzea posible dela argudiatu zuten: “La Palma uhartean egin den bezala uhateak instalatuz 1,3 milioi euroko aurrekontuarekin, egungo 20 milioi euroen aldean proiektua luzatzeko”.
