Irailaren 23an egingo da eskualdeko izaera duen VII.Ondarru-Lekitto kostaldeko lasterketa
Gaur [uztailak 5] aurkeztu dute irailaren 23an lehiatuko den lasterketa. Izena emateko aukera zabalik dago.
Gaur [uztailak 5] egin dute Ondarru-Lekitto VII. Kostaldeko lasterketaren aurkezpena Lekeitioko Tximista Atletismo Taldekoek Mendexako Leagi Campingean Lea-Artibai eskualdeko laguntzen duten udaletako ordezkariekin batera. “Lasterketak Ondarroa eta Lekeitio izenak daramatzan arren, eskualdeko izaera duen lasterketa bat da”.
Irailaren 23an 17:00etan jarri dute hitzordua Ondarroa eta Lekeitio lotzen dituen 16 kilometroko bidea osatzeko: Ondarroako Itsasaurretik abiatuko da lasterketa eta lehen bi kilometroak herriko kaleetatik egingo dituzte, kostaldeko errepidetik Mendexa eta Berriatuko zonaldeak pasako dituzte eta ibilbideko azken kilometro eta erdia Lekeitioko herrigunean egingo dute, Independentzia plazan amaituko da.
Izen ematea. Lasterketako izena ematea zabalik dago, eta www.herrikrosa.eus webgunearen bitartez egin behar da. 250ko parte hartzaile muga ezarri dute, hortaz, izen ematea irailaren 21era arte zabalik egongo da, aurretik muga hori gainditzen ez bada.
Irteera puntuan eta helmugan kontsignak egongo dira, eta autobus zerbitzua eskainiko dute lasterketa baino lehenago Lekeitiotik Ondarroara, baita amaitu ostean ere. Hornidurari dagokionez, bosgarren eta hamargarren kilometroan jarriko dituzte, ura hartu eta edan ahal izateko. Horrez gain, helmugan jan-edana ere banatuko dute.
Gizonezkoetan 2022an ezarri zuen Abdellah Taghrafetek 48 minutu eta 32 segundoko denboragaz. Emakumezkoetan, berriz, Majida Maayoufek dauka errekorra 57 minutu eta 43 segundogaz.
Urtero legez, lehen hiru gizonentzako eta lehen hiru emakumeentzako sariak banatuko dituzte; irabazleentzako txapela, garaikurra eta 250 euro, bigarrenarentzako garaikurra eta 150 euro eta hirugarrenarentzako garaikurra eta 75 euro. “Sariak berdinak izango dira mutiletan zein nesketan”. Gainera, Lea-Artibai eskualdeko lehen hiru emakumeek eta gizonezkoek ere saria jasoko dute. Horrez gain, taldekako saria ere banatuko dute, Lea-Artibaiko herri bereko lehen lau gizonek eta emakumeek ere saria jasoko dute.
Datu historikoak. Gaur-gaurkoz parte hartze daturik handiena 2019an izan zuten; 238 partaidegaz. Emakumeen kasuan, 40 parte hartzaile izatera heldu dira. Hori dela eta, taldekoek emakumeei parte hartzeko deia luzatu diete. Probako errekorra gizonezkoetan 2022an ezarri zuen Abdellah Taghrafetek 48 minutu eta 32 segundoko denboragaz. Emakumezkoetan, berriz, Majida Maayoufek dauka errekorra 57 minutu eta 43 segundogaz.
