5.676 sinadura batu ditu Euskotren 30 Minuturo plataformak
Mutrikun, Deban, Zumaian, Arroa Behean, Mendaron, Altzolan, Elgoibarren eta Eibarren egindako sinadura bilketek "arrakasta" izan dute.
Euskotren 30 Minuturo plataformak beste urrats bat eman du tren eta autobus zerbitzuen ordutegien maiztasuna areagotzeko erronkan: 5.676 sinadura lortuta eta Debabarrenako herri batzuetako udalen babesa jasota, Eusko Jaurlaritzako Garraio Sailera helarazi dute eskaera.
2022ko abenduan hasi ziren martxan Eibar eta Zumaia arteko tren zerbitzua hobetzeko kanpainarekin, hain zuzen ere, maiztasuna handitzea eskatuz. Mutrikun, Deban, Zumaian, Arroa Behean, Mendaron, Altzolan, Elgoibarren eta Eibarren egindako sinadura bilketek “arrakasta” izan dute: “Aipatu beharra dago sinatzera animatu den askok adierazi digula egun guztian zehar, baita asteburuetan ere, maiztasuna ugaritzeko eskatu beharko genukeela”.
“Milaka herritarron eskariarentzat irtenbide egoki bat izango dugulakoan. Guztion artean hobetu dezagun garraio publikoa”
Bidea abiatuta, administrazioen gain ezarri dute begirada irtenbideak bilatzeko asmoz: “Uste dugu gure herria gobernatzen duten administrazioek ezinbestean jarri behar dituztela hainbeste kezkatzen gaituen ingurumena zaintzeko baliabideak, garraio publikoa indartuz, isurketak murriztuz eta herritarron ongizatea hobetuz, besteak beste”. Sinadura bilketak izandako arrakasta ikusita Zumaiako eta Zestoako alkateek kanpaina babestu dute, eta horri esker, eta babes Eusko Jaurlaritzako Garraio Sailera helarazi dute eskaera; astean zehar Zumaia eta Eibar arteko zatian trenen maiztasuna handitzea, alegia, ordubetean behin izan beharrean, ordu erdian behin izan dadila, puntako orduetan behintzat.
Ekainaren 15ean Eusko Jaurlaritzaren erantzuna jaso zuten, eskaera Euskotreni helarazi diotela esanez, “jakinaren gainean egon dadin eta dagozkion ondorioak izan ditzan”. Egoera honen aurrean, plataformak zuzenean Euskotreni egin dio eskaera: “Lehen eskutik beraien erantzuna izango dugun esperantzarekin gaude, milaka herritarron eskariarentzat irtenbide egoki bat izango dugulakoan. Guztion artean hobetu dezagun garraio publikoa”.
Gaur egun, Zumaia eta Eibar artean trena orduro igarotzen da, eta autobusek ordutegiak trenaren ordutegi berdina izaten dutela salatu dute. Zehazki, Deba eta Eibar artean (Mallabia-Ondarroa norabidea) autobusak orduero daude, baina ia trenaren ordutegi berbera dute, eta Zumaia eta Deba (Ondarroa-Zumaia norabidea) artean, aldiz, bi eta hiru ordutik behin baino ez dago autobusa, eta trenaren ordutegiarekin bat dator. “Izugarria da trenez dabilen jende kopurua, are gehiago orain, txartelaren prezioa jaitsi denetik eta erregaien prezioaren igoera kontuan izanik. Gainera, ziur gaude maiztasuna ugarituz gero, askoz ere pertsona gehiagok erabiliko lukeela garraio hori. Izan ere, lan eta eskola ordutegiak askotan ez datoz bat trenaren ordutegiarekin, eta ordu bete zain egon beharrak kotxea hartzera bultzatzen du jendea”.
