Burdin Gazteak taldea nagusitu da Markina-Xemeinen
Hamahiru zulo oso eta 28 milimetroko hondarrak eginda gailendu da Euskadiko Harri Zulatze Txapelketan.
Argazkia: Mikel Urkia. Domekan [uztailak 9] Euskadiko Harri Zulatze Txapelketa lehiatu zuten Zelaian. Bertan elkartu ziren Bizkai, Araba eta Gipuzkoako harri zulatzailerik puntakoenak, nor baino nor gehiago aritzeko. Guztira, sei taldek parte hartu zuten Markina-Xemeingo lehiaketan: Burdin Gazteak, Kabiezes, Gallarta, Piratak, Errekatxo eta Aldai Alde.
Hamahiru zulo oso eta 28 milimetroko hondarrak lortuta, Burdin Gazteak taldeak poltsikoratu zuen garaipena. 11 zulo oso eta 125 milimetro egin zituen bigarren postuan sailkatu zen Kabizesek. Podiuma Gallartak osatu zuen, hirugarren, hamar zulo oso eta 18 milimetrogaz. Lehia estuagoa izan zen sailkapenaren behealdean. Izan ere, Piratak, Errekatxo eta Aldai Alde taldeek zulo osoen kopuru berbera egin zuten: bederatzi. Edozelan ere, Piratek 94 milimetro egin zituzten; Errekatxok, 52 milimetro; Aldai Aldek, 28 milimetro.
Argazkia: Mikel Urkia.
Harri zulatzaileez gain, Zelaira bertaratu zirenek aizkolarien erakustaldiaz gozatzeko aukera paregabea ere eduki zuten. Hodei Ezpeleta, Irati Astondoa, Jokin Urretabizkaia eta Nerea Arritu izan ziren parte hartu zuten aizkolariak.
