Erkiaga eta Ibarluzea, finalera
Erkiagak eta Ibarluzeak Barandikaren eta Basqueren kontra lehiatuko dute finala, domeka honetan (uztailak 16). Sarrerak gaurtik eskuratu daitezke.
Ekainaren 9an hasitako txapelketa domeka honetan (uztailak 16) amaituko da. Erkiaga-Ibarluzea eta Barandika-Basque bikoteek lehiatuko dute Markina-Xemeingo Grand Slamaren finala, Karmen Egunean. Finalerako sarrerak gaur eguerdian ipini dituzte salgai, Eraman Jai Alairen webgunean. 18:00etan hasiko da pilota jaialdia, eta bertaratu ezin direnek ETBn ikusi ahalko dute zuzenean.
Zapatuan (uztailak 8) jokatu zuten bigarren finalerdian, bi setak irabazita sartu ziren finalera Aritz Erkiaga ispastertar maisua eta Ion Ibarluzea markina-xemeindar gaztea. Finalerako txartela garesti zegoen, eta gogor borrokatu behar izan zuten eskuratzeko; 14 eta 15 eta 13 eta 15 nagusitu zitzaizkien Jokin Arbe markina-xemeindar aurrelariari eta lesiotik bueltan jokatu zuen Unai Lekerika gernikar atzelariari. Hiru astez kantxetako lehiatik kanpo egon ondoren, “minik sentitu barik jokatu zuen”.
Argazkia: Guk Jai Alai
Behetik gora joan zen Lea-Artibaiko bikotea. Ispastertarraren alboko erremateagaz hasi zen partidua. Urdinak aurretik hasi ziren arren, bosna berdindu ostean, Arbek eta Lekerikak aurrea hartu zuten markagailuan (7-5, 9-6, 10-7 eta 11-8). Erkiagak eta Ibarluzeak pelota motela ateratzea erabaki zuten, eta peloteoan nagusitzen hasi ziren. Horrela heldu ziren hamalaugarrenenera (11-14).
Bigarren jokoa ere bide beretik joan zen. Abantaila polita eduki zuten Arbek eta Lekerikak (8-4). Gero, zortzina berdintzea lortu zuten urdinek, baina, berriro ere aurrea hartu zuten markina-xemeindarrak eta gernikarrak. Hala ere, pelota motelagaz urdinek partidua kontrolpean zeukatela zirudien, eta azkenengo lau tantuak segituan egin zituzten. Ispastertar aurrelariak esan bezala, Ibarluzearen interesak kontuan hartuta aukeratu zuten materiala. Izan ere, pilota biziagaz jokatzea gustatzen zaio, baina Ibarluzea eroso eta konfiantzagaz egoteko bestelako materiala hautatu zuten.
Argazkia: Guk Jai Alai
Erkiagak bere dotorezia agerian utzi zuen, beste behin. Teknikoa da, kantxan denborak eta pausoak neurtzen ditu, eta zaleek gozatua hartzen dute bere jokoagaz. Horren adibide da lehenengo setean xisteran sartu zuen boteprontoa; publikoak ez zuen espero pelota horretan sartzea, baina zirkinik egin gabe lortu zuen. Bere maisutasunak aho bete hortz uzten ditu frontoian bildutakoak; intentsitatea noiz jaitsi ondo neurtzen du, behar den unean bizkortu, eta kantxan jaun eta jabe izateko.
Bestalde, jaialdiaren hasierako partiduan, Urko Lekerikak eta Ruben Bailok 15 eta 14 eta 15 eta 7 irabazi zien Martin Ormaetxeari eta Jon Zabalari.
Argazkia: Guk Jai Alai
Katedrala zain dago. Markina-Xemeinen lekukoa hartuko du asteburu honetan Gernika-Lumok. Bihar goizean aurkeztuko dute Gernikako Grand Slama, eta zapatuan hasiko dute.
Era berean, Jai Alai League-rako puntuagarriak izango diren Biarritzeko eta Donibane Lohizuneko masterren finalerdiak ere jokatuko dituzte aste honetan.
