Konposta hartzeko aukera eskaini du Amankomunazgoak
Interesa dutenek aldez aurretik eskaria egin beharko dute.
Lea Artibai Amankomunazgoak Milloiko Andonegin duen konposta hartzeko aukera eskainiko du gaurtik [uztailak 10] aurrera. Horretarako aukera edukiko dute Berriatuko, Etxebarriko, Lekeitioko, Markina-Xemeingo, Ondarroako eta Ziortza-Bolibarko herritarrek.
Lea-Artibai eskualdeko zenbait udalerritan organikoaren bilketa egiten du Amankomunazgoak kaleetan jarrita dituen 2.200 litroko edukiontzi marroien bidez. 2018tik Bizkaiko konpostegira eraman dute jasotako materia organikoa, eta orain, urte horietan sortutako konposta banatzeko aukera egongo da. Hori dela eta, Amankomunazgoak Andonegin duen pabiloiaren atzean, konpostagaz betetako edukiontzi bat du beharrezkoa denean erabili ahal izateko: “5. edukiontzia erabiltzen dutenek konposta hartzeko premia daukatenean horretarako aukera izango dute”.
Nola egin behar duten adierazteko xehetasunak eman dituzte. Lehenik eta behin, interesa dutenek aldez aurretik eskaria egin beharko dute, 900 10 48 78 telefono zenbakira deituta eta eskaria egitean ondorengo datuak eman beharko dira: izen abizenak, helbidea eta udalerria, eskari data eta organikoaren txartelaren zenbakia edo auto/auzokonpostajean parte hartzen duen ziurtagiria. Adierazi dutenez zerrendetan apuntatuta egon beharko da, eta azken atala ezinbestekoa izango da konposta hartzeko.
Behin eskaria onartuta etxebizitza bakoitzeko aukera bat egongo da konposta hartzeko. Gainera, eskatzailea bera joan beharko da Andonegira konpostaren bila; telefonoz zehaztuko dute zein egunetan eta zein ordutan joan behar den. 1x1x1 metroko zaku bat eramateko aukera egongo da, eta eskatzaileak eraman beharko du zakua, pala eta ibilgailua konposta garraiatu ahal izateko.
Amankomunazgotik xehatu dutenez hartutako konposta ezin izango da saldu edo hirugarren bati eman, ezta Lea-Artibai Amankomunazgokoa ez den beste udalerrietan erabili. “Bigarrenez hartu nahi bada, eskaria berriz egin beharko da eta Amankomunazgoak, izandako eskarien arabera, erabakiko du onartzea ala ez”.
