25.591 herritarrek bozkatu ahalko dute Espainiako Gorteetarako hauteskundeetan
Lea-Artibain eta Mutrikun, 1.554 herritarrek atzerritik emango dute bozka.
Uda sasoiaren erdi-erdian, uztailaren 23an, iritsiko dira Espainiako Gorteetarako hauteskundeak. Herritarrak hautesmahaietara hurreratzera eta bozka ematera deituak daude etzirako, eta Madalen egunez edukiko dute, hain zuzen ere, hauteskundeak orduko hausnarketa egiteko eguna. Guztira, 63.641 biztanlek edukiko dute botoa emateko eskubidea Lea-Artibain, Mutrikun eta Busturialdean: 25.591 herritarrek eman ahalko dute botoa lehendabiziko bietan, eta 38.050ek, ostera, hirugarrenean.
Zenbait udalerritan, bi alderdirik bozkatuenen arteko aldea oso apala izan zen. Esate baterako, Mendexan EAJk 108 boto poltsikoratu zituen, EH Bilduk baino boto bakar bat gehiago. Alderik handiena Ondarroan egon zen, EH Bilduk EAJk baino 497 boto gehiago eskuratu baitzituen; bestalde, bai Aulestin, bai Gizaburuagan koalizio abertzaleak arinagoko hauteskundeetan lortutako boto kopurua bikoiztu egin zuen. Hirugarren alderdirik bozkatuena Elkarrekin Podemos izan zen, 1.358 boto eskuratuta.
Gorteetarako azken hauteskundeetan, 2019an, parte hartzeak behera egin zeun eta, abstentzioa, aldiz, hazi egin zen
VOX eskuin muturreko alderdiari dagokionez, azken hauteskundeetan Espainia mailan hirugarren alderdirik bozkatuena izan arren, baina eskualdean ez zuen babes esanguratsuegirik eduki: 56 boto. Espainiako eta Euskal Herriko udalerririk gehientsuenetan gertatu zen modura, behera egin zuen parte hartzeak eta abstentzioa, aldiz, hazi egin zen.
Domekako hauteskundeetan, ordezkari bi egongo dira EAJren zerrendetan. Biak ala biak ondarrutarrak izango dira. Maria Dolores Etxano bigarren tokian joango da EAJren Bizkaiko Senaturako zerrendan; Joseba Agirretxea, aldiz, jeltzaleen Gipuzkoako Kongresurako zerrendako bigarrena izango da.
Hego Euskal Herrian, posta bidezko 262.132 boto eskaera egin dituzte
Posta bidezko “uholdea”. Hauteskundeetako berbagai nagusia posta bidezko bozka da. Izan ere, herritar ugari udako oporraldian bete-betean harrapatuko ditu botoa emateko deialdiak. Hego Euskal Herrian, posta bidezko 262.132 boto eskaera egin dituzte, eta Correosek gaurko [uztailak 21] 14:00ak arte luzatu du botoa bide horretatik emateko eskaeraren epemuga. Lea-Artibain eta Mutrikun 1.554 herritarrek atzerritik emango dute bozka.
Malen Jaiak direla eta, Mutrikun anbulatorio zaharreko hautesmahaia kiroldegira mugituko dute
Bestalde, Malen Jaiak direla eta, Mutrikun hautesmahaia anbulatorio zaharretik kiroldegira mugituko dutela adierazi du udalak. Aldaketa dela eta, autobus zerbitzua ipiniko dute, herritarrei kiroldegira joateko “erraztasunak emateko”. Zerbitzua 10:00etatik 14:00etara artekoa izango da. Autobusa Komendutik aterako da eta, bidean, Goiko Paradan etena egingo du; itzulera ibilbide beretik egingo dute.
