Kirmen Uribe: "Euskaraz mintzatzean mundua koloreztatzen ari gara"
Eusko Ikaskuntza-Laboral Kutxa saria jaso zuen atzo [uztailak 20], Beñat Garaio ikertzailearekin batera.
Kirmen Uribe idazle ondarrutarrak Eusko Ikaskuntza-Laboral Kutxa saria jaso zuen atzo [uztailak 20], Bilboko Euskalduna jauregian, bere ibilbidea balioan jarriz. Uribegaz batera, Beñat Garaio soziolinguistika-ikertzailea saritu zuten.
Ana Urkiza Eusko Ikaskuntzako lehendakariak nabarmendu zuenez, idazle bati eman dakiokeen saririk handiena “ahots propioa” duela aitortzea da eta Kirmen Uriberen kasua dela azpimarratu zuen. “Munduko buruhausteen inguruan gogoeta artistikoa egiteko ikuspegi propioa izatea. Kirmen gure herriaren, hizkuntzaren eta kulturaren ikuspegi propioa eraikiz ari da, gure herri ikuspegiari hegoak jarriz, eta gu ere unibertsal bilakatuz”.
Saria jasotzean nerabea zela sortu zitzaion hitzarekiko lilura gogoratu zuen Uribek. “Edertasuna izan zen idazteko lehen eragilea, askatasuna bigarrena, eta zubiak eraiki eta lagun hurkoa entzutea hirugarrena”. Euskararen etorkizuna ere ardatz izan zuen ondarrutarrak: “Euskara etorkizunaren, aurrerapenaren, aniztasunaren, jarraipenaren, justiziaren sinonimoa da. Euskaraz mintzatzean mundua koloreztatzen ari gara”. Horrez gain, euskararekiko arduraz ohartarazi zuen: “Gure ardura da euskara zama bat bezala ez ikustea gure gizartean. Gizartean edozein aldaketa egiteko gizartea irabazi egin behar duzu. Ez birziklatzea itsusia da ezta? ez du inork ulertzen, bada euskaraz jakinda ez hitz egitea ere halakoxea litzateke”.
Talentuaren ihesa. Bestalde, Beñat Garaio ikerlariakk Kia ora, takatāpui: māoriera eta euskararen biziberritze prozesuak elkarlotzen proiektuagatik irabazi du saria eta, garaikurra jaso ondoren, hizkuntza gutxituak biziberritzeko lanean egin duen 10 urteko ibilbidea aipatu zuen. “Ikerkuntza-lana ez da, hemen eta orain, nahikoa balioesten”. Horren aurrean, bere ibilbidean sari ugari jaso izanda ere, ikerkuntzaren ildoa alde batera uztea erabaki duela jakinarazi zuen, jardun horrek egunorokotasunean merezi duen duintasunezko baldintzak eskainiko dituen aukeraren bat sortu artean. Azkenik, talentuaren ihesaren aurkako neurriak hartu beharraz ohartarazi zuen.
