Jai giroak ez du etenik
Kuadrilla Eguna ospatzen ari dira gaur[uztailak 24] Mutrikun. Zea Maysen kontzertua egongo da gauean, Goiko Plazan.
Kuadrilla Eguneko jai giroak ez du hutsik egin Mutrikun. Goizean eguraldia lagun izan ez arren, azken orduko aldaketak egin eta haur parkean gozatzeko aukera izan dute txikienek; Miruaitz frontoira aldatu dute kokalekua. Eguerdian, ohikoa den bezala, futbitoan jokatu dute Goiko Plazan zezenekin; kasu honetan ere, euria ez da aitzakia izan mutrikuarrak gelditzeko eta lau talderen arteko lehian aritu dira.
Eguerdian, euriak etenaldi txiki bat eman duen momentuan, txarangarekin batera Beheko Plaza bete egin da: musika, jai giroa eta kolorea izan dira nagusi. Abesti eta dantza artean, mutrikuarrak aparteko giroa izan dute. Ondoren, mahai inguruan biltzeko unea heldu zaie.
Arratsaldean, berriz, sokamuturraren txanda da 18:00etan, eta ondoren, Elektropottotteren kalejira izango da giroa jartzearen ardura izango duena. Gauean, galdu ezinezko hitzordua dute zehaztuta: Zea Mays taldearen kontzertua. Gauerdian, berriz, J Martina izango da oholtzaratuko dena txosnagunean.
