Santiago Eguna, euri artean
Jaietako azken eguna dute gaur Etxebarrian, Santiago Eguna, eta azken aurreko eguna Ispasterren.
Egun bereziak pasa dituzte Etxebarritarrek ere, Santixau jaiekin. Atzo Santixau Eguna mezagaz hasi zuten, eta 12:30ean dantza emanaldia egon zen. Euria ziri-ziri ari bazen ere, aterpean dantzak lasai ikusi ahal izan zituzten herritarrek. Bazkalostean, punta-puntako pilotariak jokatzen ikusi zituzten, frontoian. Giroa bero, afalostean rantxerekin dantza egin ahal izan zuten, Puro Relajoren kontzertuagaz. Herritarrak ez ezik, inguruko jendea ere hurbildu zen bertara.
Herenegun, Umeen Egunean giro paregabeagaz pasa zuten eguna. Haur parkeaz gain, Etxebarriko 5. Chef Lehiaketan egon zen gazteentzat. Guztira hiru talde aurkeztu ziren, denak ala denak irabazteko grinagaz. Arratsaldean aldiz, bitsagaz jolasteko aukera eduki zuten umeek. Domekan nagusiak izan ziren protagonistak, zapatuan, ostera, kuadrillen eguna ospatu zuten, barikuan Uga eta Zixuren jaitsieragaz batera jaiak hasi ostean.
Txapelketaz txapelketa. Ispasterren, aldiz, santiagoak eta santanak ere ospatzen ari dira domekatik. Atzo ez zuten aspertzeko astirik eduki. Goizean goizetik hasi ziren ekintzak. 13:00etan Bizkaiko gizonezkoen 3. mailako aizkora txapelketa eta promozio mailako trontza misto txapelketa jokatu ziren. Aizkora txapelketan enborra mozten azkarrena Ruben España izan zen, 13 minutu eta 18 segunduko denboragaz. Trontza misto txapelketako irabazleak Salva Erleaga eta Iraide Gezuraga izan ziren, 4 minutu eta 50 segunduko denboragaz. Jaiak amaitu aurretik, gaurko eta biharko egunak dituzte herritarrek, aspertzeko tarterik uzten ez duen egitarauagaz.
Herenegun, Santiago Bezperagaz batera, jende asko batzen duen txupinazoa, pregoia eta Txanton Pipirriren igoeraren ostean, danborrada herrikoia egin zuten herritarrek, Aittitta Makurra txarangarekin. Eguna musikagaz amaitu zuten Zelanda taldea, Zapizar erromeria eta Dj Ztartekin.
Domekan 6. Erakus Txakurren Lehiaketa jokatu zuten. Guztira 35 txakurrek parte hartu zuten, hiru kategoria desberdinetan. Txapelketa orokorra Aitor Aizpuruak irabazi zuen, Sei de Iparragirre txakurragaz eta Otoio Elkartzeko bazkideen arteko txapela Andoni Madarietak lortu zuen, Jack txakurragaz. Azkenik, 18 urtetik beherako zortzi gazte animatu ziren parte hartzera eta guztiek lortu zuten saria, antolatzaileek aipatu dutenez «gazteetan orain arteko parte hartze handiena» izan da: «Giro oso ona egon zen, eta jende asko hurbildu zen txapelketara».
